Ҳукумати Ҷумҳурии Қазоқистон шаби панҷшанбе дар шарҳи пайвастани худ ба “Паймони Иброҳим” гуфт, ки ин амал "табиӣ ва мантиқӣ” буда, вале хабаргузории Франс-пресс онро фақат як иқдоми рамзӣ арзёбӣ кард.

“Пайвастани мо ба “Паймони Иброҳим”, ки аз қабл низ пешбинӣ гардид, идомаи табиӣ ва мантиқии сиёсатҳои хориҷии Қазоқистон мебошад, ки ба асоси гуфтугӯ, эҳтироми мутақобил ва суботи минтақавӣ устувор аст”- зикр кардааст Ҳукумати Қазоқистон.

Ба навиштаи хабаргузории Франс-пресс ин тасмими Қазоқистон бештар хислати рамзӣ дорад, зеро ин кишвари Осиёи Марказӣ қаблан низ бо Исроил робитаҳои дипломатӣ барқарор карда буд.

Стив Уиткофф, намояндаи хоси Президенти Иёлоти Муттаҳидаи Амрико дар корҳои Ховари Миёна шаби панҷшанбе гуфт, ки “як кишвари дигар ҳам шомили паймони созиш бо Исроил хоҳад шуд”.

Франс-пресс ба нақл аз Рейтерз навишт, як мансабдори баландпояи амрикоӣ, ки номаш ошкор нашудааст, гуфт, ин кишвар Қазоқистон аст.

Паймони маъруф ба “Иброҳим”, ки дар даври нахустини президентии Доналд Трамп имзо шуда буд, боиси одисозии робитаҳои Исроил бо кишварҳое чун Имороти Муттаҳидаи Араб, Баҳрайн ва Марокаш гардид.

Тибқи ин гузориш, ҳоло ҳукумати Амрико кӯшиш дорад Арабистони Саудиро низ ба ин раванд ҷалб кунад, аммо Риёз таъкид кардааст, ки бидуни пешрафти воқеӣ дар роҳи таъсиси кишвари мустақили Фаластин чунин созиш имкон надорад. Ин мавқеъ бо эътирози ошкори ҷиноҳи ростгарои режими саҳюнистӣ рӯ ба рӯ шудааст.

Бетсалел Смотрич, Вазири молияи режими саҳюнистӣ чанде қабл дар нишасти дохилӣ гуфта буд, ки “агар Арабистон ба мо бигӯяд, одисозӣ дар ивази давлати Фаластин, посухи мо ин аст: не, сипос. Ба савор шудани шутур дар саҳро идома диҳед, мо низ ба бунёди як қудрати бузурги технологӣ идома медиҳем”.

Ӯ соате баъд аз ин изҳорот бо нашри видеое дар шабакаи иҷтимоии “Х” узр хосту гуфт: “Суханам дар хусуси Арабистон комилан номуносиб буданд ва барои таҳқире, ки ба миён омад, узр мехоҳам”.

Dialog.tj