Маркази матбуоти Вазорати фарҳанги Ҷумҳурии Тоҷикистон аз ҷамъбасти Озмуни ҷумҳуриявии драмнависон хабар дод.

Ба иттилои манбаъ, дар 7 моҳи соли 2025 ба озмуни мазкур аз ҷониби муаллифони гуногун 19 асар пешниҳод гардид. Ҳамин тавр, ҳайати ҳакамон пас аз баррасӣ ҷойи якумро ба драмаи Ҷумъа Қуддус “Нури Истиқлол” сазовор донист. Ҷойи дуюм ба мазҳакаи Абдувадут Файзиев “Дар орзуи шавҳар” ва ҷойи сеюм ба драмаи Нарзулло Шарифов “Доми ғафлат” дода шуд.

Гуфта мешавад, ки се мукофоти ҳавасмандкунӣ ба драмаҳои Ато Ҳамдам “Нури мино”, Шодӣ Солеҳ “Яке рафту саг ҷакид” ва Абдуғаффори Абдуҷаббор “Муқовимат” лоиқ дониста шуданд.

“Вазорати фарҳанги Ҷумҳурии Тоҷикистон бахшида ба 35-солагии Истиқлолияти давлатии Ҷумҳурии Тоҷикистон бо мақсади дарёфти асарҳои драмавӣ дар мавзӯи муосир таҷассумгари дастовардҳои бузурги иҷтимоиву иқтисодии марҳилаҳои нави таърихӣ, дигаргуниҳои куллии рӯзафзун, мубориза алайҳи зуҳуроти номатлуби даврон, кашфи чеҳраҳои қаҳрамонҳои замони мо Озмуни ҷумҳуриявии драмнависонро эълон карда буд”, - омадааст дар иттилоия.

Ҳамчунин, иттилоъ дода мешавад, ки асарҳои ғолибон дар шакли маҷмуаи алоҳида ба табъ расида, барои таҳия ба театрҳои касбии ҷумҳурӣ тавсия дода мешаванд.

Маросими мукофотсупорӣ дар Рӯзи театри тоҷик баргузор мегардад.

Dialog.tj