Ду узви конгресси Иёлоти Муттаҳидаи Амрико Сидни Камлагер Дау ва Билл Ҳюзен дар як номаи расмӣ аз президенти Иёлоти Муттаҳидаи Амрико Доналд Трамп даъват карданд, ки нишасти сатҳи олӣ бо роҳбарони кишварҳои Осиёи Марказӣ дар доираи формати С5+1 дар Вашингтон доир кунад.

Бар асоси иттилои сомонаи расмии Камлагер Дау ин пешниҳоди вакилон бо назардошти даҳсолагии таъсиси саммит, ки соли 2015 ташкил шуда буд, пешниҳод гардид.

Формати С5+1 барои таҳким додани ҳамкориҳои Иёлоти Муттаҳидаи Амрико бо панҷ кишвари Осиёи Марказӣ, аз ҷумла Қазоқистон, Қирғизистон, Тоҷикистон, Туркманистон ва Ӯзбекистон таъсис ёфтааст. Ин платформа робитаҳоро дар соҳаҳои амният, рушди иқтисодӣ ва экологӣ густариш медиҳанд.

Дар номаи конгрессменҳо таъкид шуд, ки ширкати шахсии президент Доналд Трамп дар нишасти ҷашнӣ метавонад ба таҳким додани манфиатҳои стратегии Иёлоти Муттаҳидаи Амрико дар минтақа мусоидат кунад ва робитаи кишварҳоро дар даҳсолаи оянда мушаххас созад.

“Ширкати президент дар саммити С5+1 ин рӯйдодро ба як падидаи муҳимми дипломатӣ табдил медиҳад, ки метавонад самти нави ҳамкориҳои Иёлоти Муттаҳидаи Амрико бо Осиёи Марказиро барои даҳ соли оянда мушаххас кунад”- зикр шудааст дар номаи конгрессменҳо.

Онҳо аз ҳукумат хостанд, ки то доир шудани нишаст созишномаҳои навро таҳия кунанд ва ба ҳамкории амаливу шарикии дарозмуддат замина гузоранд.

Ёдовар мешавем, ки формати Осиёи Марказӣ – ИМА (С+1) моҳи ноябри соли 2015 баъд аз мулоқоти вазирони корҳои хориҷӣ дар Самарқанд таъсис ёфт. Дар солҳои ахир ин саммит мунтазам баргузор мешавад ва дар моҳи сентябри соли 2023 низ доир шуда буд.

Охирин нишасти вазирон дар доираи С5+1 рӯзи 28-уми феврали соли 2024 дар шаҳри Остона доир шуда буд, ки дар он ҷонибҳо масъалаҳои рушди тиҷорат, ҷалби сармоя ва ҳамкориҳои иқтисодиро баррасӣ намуданд.

Пешниҳоди баррасии нишасти навбатӣ дар шаҳри Вашингтон аз ҷониби коршиносон қадами муҳимми нав дар робитаи Иёлоти Муттаҳидаи Амрико бо кишварҳои Осиёи Марказӣ арзёбӣ мешавад, ки метавонад оғози марҳилаи тозаи ҳамкориҳои сиёсӣ ва иқтисодиро дар ин минтақа таъмин намояд.

Dialog.tj