Созмони Милали Муттаҳид гуфт, ки тақрибан 15 рӯз баъд аз эълони оташбас миёни Исроил ва Ҳамос беш аз 1 миллион нафар дар Навори Ғазза ба кумакҳои изтирорӣ ва башардӯстона ниёз доранд.

Тибқи гузориши дафтари Созмони Милали Муттаҳид дар Ғазза тақрибан 1,1 миллион нафар бидуни дастрасӣ ба ғизо мондаанд ва беш аз 2,1 миллион нафар дар остонаи гуруснагии шадид қарор доранд.

Бар асоси иттилои шабакаи “Ал-Ҷазира” оилаҳои фаластинӣ баъд аз бозгашт ба манзилҳои вайроншуда, бо камбудии ғизо, об ва хизматрасонии тиббӣ рӯ ба рӯ шудаанд. Созмони ҷаҳонии тандурустӣ низ хабар дод, ки дастрасӣ ба оби нӯшокӣ барои як миллион нафар ба камтар аз 6 литр дар як рӯз коҳиш ёфтаааст ва кумакҳои башардӯстона ҳанӯз бо монеаҳои ҷиддӣ рӯ ба рӯ мешаванд.

Дар ҳамин ҳол, Ҳамос баъд аз мулоқот бо гурӯҳҳои фаластинӣ дар Қоҳира ба ташкили як комиссияи муваққатии мустақил аз технократҳо барои идораи Ғазза баъд аз ҷанг розӣ шудааст.

Тибқи изҳороти муштараке, ки дар сомонаи Ҳамос нашр шуд, ин комиссия корҳои рӯзмарра ва хадамоти асосиро бо ҳамкории кишварҳои арабӣ ва ниҳодҳои байналмилалӣ идора хоҳанд кард.

Аз ҷониби дигар, Марко Рубио, Вазири корҳои хориҷии Иёлоти Муттаҳидаи Амрико, ки барои назорати иҷрои оташбас ба Исроил сафар намудааст, ширкати Созмони Милал ва Ҳамосро дар идораи ояндаи Ғазза рад намуд.

Ӯ дар нишасти матбуотӣ дар шаҳри Кирият Гат гуфт, ки “UNRWA як шохаи Ҳамос аст. Ҳамос наметавонад дар ҳукуматдории Ғазза нақш дошта бошад”.

Dialog.tj