Тавре ки АМИТ “Ховар” хабар медиҳад, барои омӯзгорони Донишгоҳи давлатии Данғара ду бинои нуҳошёнаи истиқоматӣ сохта мешавад.

Ба навиштаи манбаъ, сохтмони биноҳо дар масоҳати 1430 метри мураббаъ дар кӯчаи Исмат Шарифи шаҳраки Данғара ба нақша гирифта шуда, дар 3 сол омода хоҳанд шуд.

Иттилоъ дода мешавад, ки ҳарду бино аз нуҳ ошёна иборат буда, 36 хонаи дуҳуҷрагӣ бо масоҳати 67,84 метри мураббаъ ва 36 хонаи якҳуҷрагӣ бо масоҳати 52,80 метри мураббаъ пешбинӣ гардидааст. Гуфта мешавад, ки сохтмонҳои мазкур барои таъмини 72 оилаи омӯзгор бо манзили истиқоматӣ пешбинӣ гардидаанд.  

Гуфтан бамаврид аст, ки дирӯз, 23-юми октябр Президенти мамлакат муҳтарам Эмомалӣ Раҳмон дар ифтитоҳи ду бинои нави таълимии Донишгоҳи давлатии тиббии Хатлон иштирок намуданд ва ҳамин ҷо бо лоиҳаи бунёди ду бинои нуҳошёнаи истиқоматӣ барои омӯзгорони Донишгоҳи давлатии Данғара шинос шуданд.

Dialog.tj