ФИФА раддабандии нави худро нашр кард ва дар он тими миллии Тоҷикистон ду зина боло шуд.

Ҳамин тавр, мунтахаби Тоҷикистон аз ҷойи 104-ум ду зина боло рафта, дар ҷойи 102-юм қарор гирифтааст.

Гуфта мешавад, ки тими миллии Тоҷикистон бо 1220,21 хол ҳоло дар зинаи 102-юм қарор дорад ва аз мавқеи пешинааш 14,06 хол зиёд аст.

Ёдовар мешавем, ки моҳи ҷорӣ мунтахаби Тоҷикистон ду бозӣ зидди тими миллии Малдив дар доираи марҳилаи интихобии Ҷоми Осиё-2027 гузаронида, бо ҳисоби 2:0 ва 3:0 ғолиб омад.

Тибқи иттилои сомонаи расмии ФИФА ҳоло даҳгонаи беҳтарин мунтахабҳои ҷаҳон чунин тартиб доранд: Испания, Аргентина, Фаронса, Англия, Португалия, Нидерландия, Бразилия, Белгия, Италия ва Олмон.  

Дар раддабандии нави ФИФА дида мешавад, ки дар даҳгонаи беҳтаринҳо мунтахабҳои Фаронса  ва Бразилия як зина поён, Аргентина ва Италия як зина боло гардида, Хорватия ду зина поён шуда, аз даҳгона баромадаасту Олмон ду зина боло гардида, ба даҳгонаи беҳтаринҳо шомил шудааст.

Dialog.tj