Азим Иброҳим, вазири нақлиёти Ҷумҳурии Тоҷикистон дар ҷаласаи назоратӣ роҳбарони воҳидҳои сохторӣ ва муассисаву корхонаҳои марбутаи тобеи Вазоратро муваззаф намуд, ки тадбирҳои банақшагирифташуда ҷиҳати омодагӣ ба зимистон бояд ҳарчӣ зудтар ва дар сатҳи зарурӣ анҷом дода шаванд.

Тавре ки маркази матбуоти Вазорати нақлиёти Ҷумҳурии Тоҷикистон хабар медиҳад, гурӯҳи кории вазорат ба санҷиши ҳолат ва омодагии муассисаву корхонаҳои соҳа ва иншооти инфрасохтори роҳу нақлиёт ба зимистон сафарбар гардиданд.

“Рафти таъмири ҷории техника ва механизмҳои нигоҳдории роҳҳо, тоза кардани роҳҳо аз сангу шағал пас аз боришоти шадид ва тармафароӣ, ки метавонад барои ронандагон мушкил эҷод кунад, хариди маводи сӯзишворӣ ва зидди лағжиш, либоси корӣ барои роҳсозон, чархҳои мавсимӣ, аккумулятор ва дигар қисмҳои эҳтиётӣ санҷида мешавад”, - зикр мегардад дар иттилоияи вазорат.

Азим Иброҳим ба роҳбари Ситоди омодасозии соҳа ба мавсими тирамоҳу зимистон, муовини якуми вазир Фаррух Неъматзода дастур дод, ки ҳамаи тадбирҳои асосии нақшавӣ то 1-уми ноябр бояд ба анҷом расонида шаванд.

Ҳамчунин, гуфта мешавад, ки ба Хадамоти давлатии назорат ва танзим дар соҳаи нақлиёт, МД «Нақлиёти автомобилӣ ва хизматрасонии логистикӣ», КВД «Маркази рақамикунонии соҳаи нақлиёт» ва корхонаю муассисаҳои нигоҳдории роҳҳои автомобилгард супориш дода шуд, ки назорати доимии ҳолати роҳҳои истифодаи умум, аз ҷумла тавассути системаи рақамӣ, риояи қоидаҳои ҳаракати воситаҳои нақлиёти гаронвазн ва калонҳаҷм ва сари вақт бартараф намудани нуқсонҳоро таъмин намоянд.

Dialog.tj