Маркази матбуот ва иттилооти Вазорати мудофиаи Ҷумҳурии Тоҷикистон хабар медиҳад, ки дар даҳ рӯзи маъракаи даъвати тирамоҳӣ ба сафи Қувваҳои мусаллаҳ нақшаи даъват дар қаламрави ҷумҳурӣ 78 фоизро дар бар гирифта, наздики 30 шаҳру ноҳияи мамлакат аз иҷрои пурраи он гузориш доданд.

Манбаъ меафзояд, ки шаҳру навоҳии Вилояти Мухтори Кӯҳистони Бадахшон дар рӯзи якуми даъват нақшаро 100 фоиз иҷро намуд.

Ноҳияҳои Рашт, Сангвор, Лахш, Нуробод ва Тоҷикобод низ дар рӯзи нахустини ин чорабинии муҳими сиёсӣ нақшаи пешбинишударо сад фоиз ба анҷом расониданд ва иҷрои нақша дар шаҳру ноҳияҳои тобеи ҷумҳурӣ ҳоло ба 72 фоиз баробар мебошад.

Гуфта мешавад, ки дар 10 рӯзи маъракаи сиёсӣ ноҳияҳои Вахш, Балҷувон, Ховалинг, Норак, Ёвон, Фархор, Хуросон, Левакант, Бохтар, Носири Хусрав, Дустӣ, Шаҳритус ва Ҷайҳун аз анҷоми даъвати тирамоҳии шаҳрвандон ба хизмати ҳатмии ҳарбӣ гузориш доданд ва дар умум, вилояти Хатлон 91 фоиз нақшаро иҷро кардааст.

Иттилоъ дода мешавад, ки нақшаи даъват дар вилояти Суғд 64 фоиз иҷро шуда, ноҳияи Айнӣ нақшаи пешбинигардидаро пеш аз муҳлат пурра иҷро намудааст.

Зикр мегардад, ки нақшаи даъват дар шаҳри Душанбе 71 фоиз иҷро гардидааст.

Dialog.TJ