Дар шаҳри Тифлиси Гурҷистон мухолифони ҳукумати феълӣ тазоҳурот намуда, Қасри президентро муҳосира намуданд. Дар ин тазоҳурот садҳо нафар ширкат карда ва талаб доштанд, ки натиҷаҳои интихоботи маҳаллӣ бекор карда шавад.

Дар ҳамин ҳол, чанд дақиқа қабл хабаргузории ТАСС –и Русия иттилоъ дод, ки тазоҳургарон дар шаҳри Тифлис – пойтахти Гурҷистон, майдону кӯчаҳои атрофи Қасри Президентро тарк карданд. Ҳоло бинои қаср таҳти назорати комили қувваҳои полис қарор дорад.

Тибқи гуфтаи шоҳидон, дар ҷараёни тазоҳурот даргирӣ ба қайд гирифта нашудааст.

Тазоҳурот на фақат дар атрофи Қасри Президент, балки дар атрофи Майдони озодӣ низ баргузор гардид. Намояндагони оппозитсияи гурҷӣ таъкид намуданд, ки интихоботи парлумонии соли гузашта дар кишвар “тақаллубӣ” баргузор шудаанд. Ба гуфтаи онҳо, интихоботи шаҳрдории рӯзи шанбе низ ғайриқонунӣ буда, натиҷаҳои он набояд пазируфта шавад.

Сабаби асосии тазоҳурот изҳороти ҳизби ҳокими “Орзуи гурҷӣ”, ки пирӯзии худро дар интихобот эълон карда ва ҳамзамон қарор дод, то муваққатан раванди ҳамгироӣ бо Иттиҳоди Аврупоро боз дорад. Тазоҳуротгарон талаб доранд, ки ҳукумат истеъфо диҳад ва ҷараёни пайвастан ба Иттиҳоди Аврупо аз сар гирифта шавад.

Бар асоси гузоришҳо, қувваҳои амниятӣ барои пароканда кардани мардум аз дубинка ва мошинҳои обпош истифода намудаанд. Дар ҳамин ҳол, ба сӯи пойтахт гурӯҳҳои нави эътирозгарон аз шаҳрҳои дигар ҳаракат доранд.

Дар навбати худ Сарвазири Гурҷистон Ираклий Кобахидзе гуфт, ки бетартибиҳои Тифлис гӯё “бо дахолати хадамоти махсуси хориҷӣ” ташкил ва роҳандозӣ шудааст.

Dialog.tj