Лавров дар ҳошияи нишасти Формати Маскав бо вазири хориҷаи Толибон дидор мекунад

Вазорати корҳои хориҷии Федератсияи Русия эълон кард, ки Сергей Лавров, Вазири корҳои хориҷии ин кишвар қарор аст дар ҳошияи нишасти машваратии Формати Маскав бо Амирхон Муттақӣ, сарпарасти Вазорати корҳои хориҷии Иморати Исломии Афғонистон дидору гуфтугӯ кунад.

Ҳамоиши “Формати Маскав” доир ба масъалаҳои Афғонистон рӯзи 7-уми октябри соли 2025 бо ширкати намояндагони кишварҳои минтақа, аз ҷумла Ҳиндустон, Эрон, Қазоқистон, Чин, Қирғизистон, Покистон, Русия, Тоҷикистон, Туркманистон ва Ӯзбекистон баргузор мешавад.

Мария Захарова, сухангӯи Вазорати корҳои хориҷии Федератсияи Русия рӯзи панҷшанбе дар як нишасти хабарӣ гуфт, ки ҳайте аз Беларусия низ ба ҳайси меҳмони хос ба ин ҳамоиш даъват шудаанд.

Ин нишаст, ки бо роҳбарии Сергей Лавров ва ба шакли ғайриошкоро баргузор мегардад, як чорчӯби машваратии минтақавӣ барои баррасии вазъияти амниятӣ, сиёсӣ ва башардӯстонаи Афғонистон баъд аз таҳаввулоти ахир аст.

Бар асоси изҳороти расмӣ меҳвари асосии баҳсҳо дар ин нишаст, тарвиҷи оштии миллӣ дар Афғонистон ва густариши ҳамкориҳо миёни кишварҳои минтақа ва Кобул дар самтҳои сиёсӣ, иқтисодӣ, мубориза бо терроризм ва маводи мухаддир хоҳад буд. Дар поён нишаст ширкаткунандагон изҳороти муштарак содир мекунанд.

Dialog.tj