Ду муассисаи таҳсилоти миёнаи умумӣ баъд аз бозсозӣ дар ноҳияҳои Рашту Тоҷикобод, ки бар асари заминларзаи соли ҷорӣ осеб дида буданд, расман ифтитоҳ ёфт.

Дар расми кушодашавии он намояндагони мақомоти маҳаллӣ, Сафири Фавқулодда ва Мухтори Ҷумҳурии Корея дар Ҷумҳурии Тоҷикистон Ҷон Сонг Шик ва Адҳам Мусаллам Намоянда ва директори Барномаи озуқавории ҷаҳонӣ дар Ҷумҳурии Тоҷикистон иштирок доштанд.

Дар ин бора ба Dialog.TJ аз дафтари матбуотии Барномаи озуқавории ҷаҳонии Созмони Милали Муттаҳид дар Тоҷикистон хабар доданд.

Гуфта мешавад, ки навсозии муассисаи таҳсилоти миёнаи умумии рақами 56-и ноҳияи Рашт ва муассисаи таҳсилоти миёнаи умумии рақами 33-и ноҳияи Тоҷикобод, ки дар ин ду муассисаи таълимӣ тақрибан 180 хонанда ба таҳсил фаро гирифта мешаванд. Ҳамчунин, дар муасссисаҳои мазкур ошхонаҳои нави мактабӣ сохта шуданд, ки фаъолияти ғизодиҳии мактабҳоро дар доираи Барномаи ғизои мактабӣ дастгирӣ мекунанд.
Корҳои бозсозӣ аз ҷониби Ҳукумати Ҷумҳурии Тоҷикистон, Барномаи озуқавории ҷаҳонии Созмони Милали Муттаҳид (БОҶ) ва Ҳукумати Ҷумҳурии Корея ба роҳ монда шуд.

Адҳам Мусаллам, Намоянда ва директори БОҶ дар Тоҷикистон дар суханронии хеш қайд кард, ки бо шарофати дастгирии мардум ва Ҳукумати Ҷумҳурии Корея кӯдакони навоҳии дурдасти водии Рашт ҳоло ба таҳсилоти босифат дастрасӣ доранд ва ин иқдом барои бунёди ояндаи дурахшон ва ҷомеаҳои қавитар мусоидат мекунанд.

Аз соли 1999 инҷониб БОҶ бо Ҳукумати Ҷумҳурии Тоҷикистон барои амалӣ намудани Барномаи ғизои мактабӣ дар кишвар ҳамкорӣ менамояд. Дар соли 2025 Барномаи ғизои мактабии БОҶ беш аз 416 ҳазор хонандаи синфҳои ибтидоиро дар беш аз 1900 муассисаи таълимии 53 ноҳия ва шаҳрро фаро гирифтааст.

Dialog.tj