Бо дастгирии Федератсияи Русия дар Ҷумҳурии Тоҷикистон барномаи васеи коромӯзӣ барои мутахассисони ҷавон ва хатмкунандагони донишгоҳҳо оғоз гардид. Барнома бо ҳадафи рушди касбии ҷавонон ва баланд бардоштани имкониятҳои онҳо амалӣ мегардад.

Бино ба иттилои дафтари матбуоти ИДМ ин ташаббус дар доираи лоиҳаи Барномаи рушди Созмони Милали Муттаҳид (ПРООН), “Баланд пардоштани имкониятҳои ҷавонон ба воситаи рушди касбӣ ва пешбурди инноватсияҳо дар Тоҷикистон” бо маблағгузории Русия роҳандозӣ карда мешавад.

Масъулони сафорати Русия дар Ҷумҳурии Тоҷикистон таъкид карданд, ки Русия омода аст ҳама кумакҳоро барои рушди касбии ҷавонони тоҷик ва таъмин кардани ояндаи муваффақонаи онҳо фароҳам кунад.

Тибқи барнома 200 ҷавони мутахассис ва хатмкардаи донишгоҳҳо имконият хоҳанд дошт, дар корхонаҳои пешрафтаи кишвар коромӯзӣ гузаранд. Аз ҷумла, ҳамкорон – холдинги “Авесто Групп”, ширкати алюминии “Талко”, “Алиф бонк ” ва дигар ширкатҳои хусусӣ ва агентии кадрӣ мебошанд.

Ташаббускорон таъкид намуданд, ки барнома ба рушди малакаҳои касбӣ, баланд бардоштани рақобатпазирии ҷавонон дар бозори меҳнат ва рушди иқтидори инноватсионии кишвар равона шудааст.

Dialog.tj