Муҳаммад Ҷавод Зариф, собиқ Вазири корҳои хориҷии Ҷумҳурии Исломии Эрон дар изҳороти тозаи худ гуфт, ки Барномаи атомии Эрон фақат қудрат ва амнияти низомӣ нест, балки ҷанбаи асосии он “иззат ва ифтихори миллӣ” мебошад.

Вазири собиқи корҳои хориҷии Ҷумҳурии Исломии Эрон дар ҷараёни суханронии онлайнӣ дар “Анҷумани назорати силоҳ”  бо ишора ба зарфиятҳои атомии Эрон гуфт, ки ҷаҳон аксаран фаъолияти атомии Эронро бо айни таҳдид  ва “гурез аз масъулият” мебинад, аммо воқеият ин аст, ки миллати Эрон ин барномаро ба ҳайси рамзи истиқлол, муқовимат ва ҳувияти миллӣ  арзёбӣ мекунад.

Собиқ Вазири корҳои хориҷии Эрон бо ишора ба собиқаи чанд даҳсолаи таҳримҳо, ҳамлаҳои киберӣ, қатли олимони атомӣ ва ҳатто зарбаҳои низомӣ таъкид кард, ки ҳама ин фишорҳо фақат Эронро аз роҳ боз надоштанд, балки иродаи онро қавитар карданд.

“Эрон агар мехост силоҳи атомӣ созад, кайҳо онро месохт. Аммо мо бо вуҷуди пардохтани қиммати сангин, аз чунин роҳ канорагирӣ кардаем, зеро мақсад сохтани бомба нест, балки ҳифзи иззат ва истиқлол аст” – таъкид кард ӯ.

Муҳаммад Ҷавод Зариф, гуфт, иштибоҳи асосии сиёсатҳои Аврупо дар се даҳсолаи ахир он аст, ки масъалаи атомии Эронро фақат аз чорчӯби “пешгирии паҳншавӣ” ва “таҳдид” дидаанд, ин дар ҳолест, ки аз нигоҳи Теҳрон, масъала қабл аз ҳама бо “шаъну шараф ва ифтихори миллӣ” бастагӣ дорад.

Вазири корҳои хориҷии собиқи Ҷумҳурии Исломии Эрон ба таҷрибаи созиши Барномаи иқдоми ҷомеаи муштарак ишора карда гуфт, ки ин созиш фақат замоне имконпазир гардид, ки кишварҳои абарқудрат нисбат ба Эрон ҳамчун як ҷониби баробар муносибат карданд.

“Мо фақат вақте маҳдудиятҳои бесобиқаи назоратиро пазируфтем, ки эҳтироми мутақобил ва баробар ба расмият шинохта шуд” – гуфт Муҳаммадҷаводи Зариф.

Ӯ таъкид кард, ки ҳамлаҳои такрории Исроил ва сиёсати “фишори максималӣ” на фақат Эронро боз надоштанд, балки боиси он шуданд, ки ҷомеаи Эрон дар атрофи рамзи истиқлол муттаҳид шаванд.

Dialog.tj