Таҷрибаи Тоҷикистон дар самти омӯзиши бозори меҳнат дар Форуми байналмилалии “Аз камбизоатӣ ба рушд”, ки дар шаҳри Намангони Ӯзбекистон доир шуд, муаррифӣ гардид. Дар ин хусус Вазорати меҳнат, муҳоҷират ва шуғли аҳолии ҷумҳурӣ хабар дод.

Дар Форум намояндагони беш аз 30 созмони байналмилалӣ ва тақрибан 200 коршинос аз кишварҳои мухталиф ширкат карданд. Тоҷикистонро дар ин форум вазири меҳнат, муҳоҷират ва шуғли аҳолӣ Солеҳа Холмаҳмадзода намояндагӣ карда ва таҳти унвони “Малакаҳо ҳамчун омили рушди устувор: таҷрибаи Тоҷикистон дар омӯзиши бозори меҳнат” суханронӣ кард.

“Мубориза бо камбизотӣ ҷузъи ҷудоинопазири сиёсати иҷтимоӣ буда, шарти муҳимми таъминоти субот, адолати иҷтимоӣ ва баланд бардоштани сатҳи зиндагии мардум аст. Форуми байналмилалӣ имконият медиҳад, ки таҷрибаи муваффақ мубодила гардад, роҳҳои ҳалли мушкилоти шуғл ва камбизоатӣ баррасӣ шуда, ҳамкории самаранок ба роҳ монда шавад”- таъкид кард вазири тоҷик.

Дар маърузаи вазир зикр шуд, ки рушди шуғли истеҳсолӣ ва омодасозии кадрҳои соҳибихтисос яке аз самтҳои стратегии ҳукумати Тоҷикистон ба шумор меравад: “Солҳои ахир дар ин самт дастовардҳои назаррас ҳосил шудаанд, аз ҷумла баланд бардоштани сатҳи тайёрии касбии шаҳрвандон, таъсиси ҷойҳои нави корӣ, ҷорӣ кардани барномаҳои муосир оид ба рушди малакаҳо ва ғайра” – таъкид намуд вазири тоҷик.

Ширкаткунандагони форум масъалаҳои муҳимми рушди иҷтимоию иқтисодӣ, татбиқи таҷрибаҳои самарабахши шуғл, баланд бардоштани малакаи захираҳои меҳнатӣ ва коҳиши сатҳи камбизоатиро дар кишварҳои Осиёи Марказӣ ва ҷаҳон баррасӣ намуданд.

Dialog.tj