Имрӯз, 24-уми сентябр дар Қасри теннис ва маҷмааи варзиши обии шаҳри Душанбе тими миллии футзали Тоҷикистон дар доираи даври ниҳоии марҳилаи интихобии Ҷоми футзали Осиё-2026 бо мунтахаби Ҷопон рақобат мекунад.

Оғози бозӣ соати 20:00 бо вақти Тоҷикистон буда, арзиши билет барои ду бозии имрӯз 30 сомонӣ муқаррар гардидааст.

Бояд гуфт, ки тими миллии футзали Ҷопон дар гурӯҳи “С” пурқуваттарин даста маҳсуб меёбад, зеро қаҳрамони чоркаратаи Осиё мебошад.

Ёдовар мешавем, ки тими миллии футзали Тоҷикистон дар даври якум бо мунтахаби Макао рақобат карда, бо ҳисоби бузурги 10:2 ғалаба кард. Ҳамчунин, дар даври дуюм футзалбозони тоҷик бо тими миллии Камбоҷа вохӯрданд ва бо ҳисоби 7:1 ғолиб омаданд.

Ҳоло дар ҷадвали гурӯҳи “С” мунтахабҳои Ҷопону Тоҷикистон бо шаш имтиёзӣ дар ҷой якуму дуюм қарор доранд.

Гуфта мешавад, ки ғолибони ҳашт гурӯҳи интихобӣ ва ҳафт дастаи беҳтарини ҷойҳои дуюм ба қисми ниҳоии Ҷоми Осиё-2026, ки аз 27-уми январ то 7-уми феврали соли 2026 дар Индонезия баргузор мешавад, роҳ меёбанд.

Dialog.tj