Чанд рӯз пеш Раҳим Саидзода, вазири маориф ва илми Ҷумҳурии Тоҷикистон зимни сафар ба Муассисаи таҳсилоти миёнаи умумии №16-и ноҳияи Ёвон камбудиҳои зиёдро дар самти таълим, тарбия, интизоми меҳнат, вазъи моддию техникӣ ва муҳити дохилимуассисавӣ ошкор карда буд.

Дар ин росто, имрӯз, 22-юми сентябр маркази матбуоти вазорат хабар дод, ки дар муассисаи мазкур ҳамаи камбудиҳои дар ҷараёни боздиди вазир ошкоргардида, аз қабили риоя нашудани интизоми дохилӣ, нокифоя будани шароити омӯзишӣ, истифода набурдани таҷҳизоти техникии мавҷудбуда, омезиши синфҳо дар соати дарсӣ, надоштани назорат аз болои иштироки хонандагон дар дарс ва ҳолати санитариву ободонии муассиса пурра ислоҳ ва ба меъёрҳои муқарраршуда мутобиқ гардонида шуданд.

“Бо дарназардошти вазъи баамаломада ва бемасъулиятии роҳбарияти муассиса дар самти иҷрои уҳдадориҳои вазифавӣ, таъмини назорати дохилӣ ва риояи меъёрҳои муқарраршудаи таҳсилот, директори Муассисаи таҳсилоти миёнаи умумии №16 ноҳияи Ёвон Мирзозода Мунира, ки аз соли 2014 инҷониб вазифаи мазкурро бар уҳда доштааст, аз вазифаи ишғолнамуда озод карда шуд”, - зикр мекунад манбаъ.

Dialog.tj