Мақомоти Вазорати корҳои хориҷаи Эрон мегӯянд, ки дар сурати бозгашти таҳримҳои Шурои амнияти Созмони Милали Муттаҳид тафоҳумномаи Эрон бо МАГАТЭ боз дошта хоҳад шуд.

Козим Ғарибободӣ, муовини Вазири корҳои хориҷии Ҷумҳурии Исломии Эрон таъкид кард, ки агар таҳримҳо дар таърихи 27-уми сентябр боз гарданд, ҳамкориҳо бо МАГАТЭ қатъ хоҳад шуд.

Чанде қабл Сайид Аббос Ироқчӣ, Вазири корҳои хориҷии Ҷумҳурии Исломии Эрон дар Қоҳираи Миср бо МАГАТЭ дар хусуси аз сар гирифтани ҳамкориҳои дуҷониба созишнома имзо карда буд.

Козим Ғарибободӣ бо ишора ба раъйгирии охирин дар Шурои амният, ки ба тасвиби қатъномаи пешниҳодӣ нарасид, афзуд, ки то як ҳафтаи дигар имкони пешгирӣ аз бозгашти таҳримҳо вуҷуд дорад. Агар иқдоми дипломатӣ рӯй надиҳад ва таҳримҳо баргарданд, боз доштани тафоҳумнома бо агентӣ пурра мантиқӣ ва рӯшан хоҳад буд.

Ғарибободӣ афзуд, ки Вазири умури хориҷии Эрон баъди имзои тафоҳум дар Қоҳира ба рӯшанӣ гуфта буд, ҳар гуна иқдоми душманон бар зидди Эрон, аз ҷумла бозгашти таҳримҳои Шурои амният ё иҷрои “Снэп-бек” ин тафоҳум иҷро нахоҳад шуд.

Ӯ гуфт, ки иқдомҳои баъдии Эрон дар робита ба бозгашти таҳримҳои Шурои амният баъди баррасии вазъият эълон хоҳад шуд. Муовини Вазири корҳои хориҷии Ҷумҳурии Исломии Эрон гуфт, ки Эрон бо ҳушёрӣ дар баробари иқдомҳои душманона амал намуда, посух хоҳад дод.

Dialog.tj