Имрӯз, 18-уми сентябр дар шаҳри Остона, дар ҳошияи Иҷлосияи VIII-и Съезди пешвоёни динҳои ҷаҳонӣ ва анъанавӣ Президенти Қазоқистон Қосим-Жомарт Токаев ба як қатор иштирокчиён мукофтҳои давлатӣ супорид.

Дар миёни барандагони ҷоиза Раиси Шурои уламои Ҷумҳурии Тоҷикистон Саидмукаррам Абдулқодирзода низ қарор дошт, ки бо медали ифтихории Съезд барои саҳми назаррас дар рушди муколамаи байнидинӣ ва таҳкими сулҳ қадрдонӣ шуд.

Бар асоси иттилои расонаҳо, Сайидмукаррам Абдулқодирзода дар ҷараёни суханронии худ таъкид кард, ки таҳкими эътимод ва ҳамдигарфаҳмӣ дар миёни дину фарҳангҳо барои эҷоди сулҳу субот дар ҷаҳони муосир аҳамияти хоса дорад. Ӯ зарурати ҳамкории наздики ҷомеаҳои динӣ ва фарҳангиро барои ҳалли мушкилоти ҷаҳонӣ, аз қабили хушунат ва экстремизм таъкид намуд.

Дар навбати худ Президент Қосим-Жомарт Токаев нақши муҳимми пешвоёни динӣ дар ҳалли мушкилоти ҷаҳонӣ, аз ҷумла масъалаи тағйирёбии иқлимро зикр кард ва пешниҳод намуд, ки созмонҳои динӣ дар боло бурдани огоҳии ҷамъиятӣ оид ба масъалаҳои экология ва рушди устувор саҳми бештар гузоранд.

Қосим –Жомарт Токаев афзуд, ки руҳониён бо нуфузи баланди худ метавонанд нақши калидӣ дар ташаккули маърифати нави экологӣ ва эҳсоси масъулият дар миёни мардум бозанд.

Раиси Шурои уламои Ҷумҳурии Тоҷикистон Саидмукаррам Абдулқодирзода дар кори Съезди пешвоёни динҳои ҷаҳонӣ ва анъанавӣ, ки рӯзи 17-уми сентябр дар Остона таҳти раёсати Президенти Қазоқистон ифтитоҳ гардид, ширкат намуд. Дар ҳошияи нишаст Раиси уламои Тоҷикистон бо ҳамтоёни худ аз кишварҳои мухталиф мулоқот намуд.

Дар иҷлосия беш аз 700 вакил аз 60 кишвари ҷаҳон, аз ҷумла намояндагони ҳамаи динҳои бузурги ҷаҳонӣ ва созмонҳои байналмилалӣ ширкат намуданд.

Dialog.tj