Мулло Ҳайбатуллоҳ Охундзода, роҳбари Толибон дар фармони наваш дастур додааст, ки бо мақсади “пешгирӣ аз мункарот” дастрасии мардум ба интернет дар саросари Афғонистон қатъ карда шавад. Иҷрои ин фармон аз рӯзи душанбе, 15-уми сентябр аз шаҳри Мазори Шариф, маркази вилояти Балх оғоз шуда ва қарор аст дар дигар шаҳрҳо низ амалӣ шавад.

Ҳоҷӣ Зайд, сухангӯи ҳукумати Толибон дар Балх гуфт, ки барои қонеъ кардани ниёзҳои зарурӣ “роҳи алтернативӣ дар дохили кишвар” таъсис дода мешавад.

Қатъ намудани интернети нахи оптикӣ таъсири ҷиддӣ ба кори ниҳодҳои давлатӣ ва бахшҳои тиҷоратӣ хоҳад дошт. Ширкатҳои хизматрасони интернет ва муассисаҳои таълимӣ аз ҳоло бо нигаронӣ ба муштариён иттилоъ медиҳанд ва садҳо ҳазор корбарон, аз ҷумла духтарону заноне, ки ба таҳсилу кор дар фазои маҷозӣ рӯ оварда буданд, бо маҳрумият рӯ ба рӯ шудаанд.

Юсуф Вазоф, раиси Толибон дар вилояти Балх ва яке аз чеҳраҳои пурқудрат ва наздик ба Охундзода нахустин касест, ки амри манъи истифодаи интернети нахи оптикӣ дар вилояташро амалӣ намудааст. Аммо Вазири алоқа ва технологияҳои Толибон бо ин фармон розӣ набуда, бо сабаби мухолифатҳои дохилӣ ҳанӯз дар саросари кишвар онро иҷро накардааст.

Фармони ҷадиди роҳбари Толибон мухолифатҳои зиёдеро ҳатто дар сафи кормандони ин гурӯҳ ба вуҷуд овардааст. Бар асоси иттилоъ, 6 вазири ин гурӯҳ барои музокира ва қонеъ кардани роҳбари Толибон ба Қандаҳор рафтаанд. Вазирон мехоҳанд, роҳбари Толибонро водор кунанд, ки аз ин тасмим сарфи назар кунад.

Dialog.tj