Этнографи рус Святослав Каверин дар суҳбат бо рӯзномаи “Газета.Ру” гуфтааст, дар сафар ба Афғонистон ғайричашмдошт аз сӯи Толибон боздошт шуд. Ӯ мегӯяд, ки Толибон ба хотири ин ки ҳамроҳаш акси Аҳмадшоҳ Масъуд буд, боздошт  кардаанд.

Святослав Каверин гуфта, ки аксҳои қаҳрамони Афғонистон ва муборизи зидди Толибон Аҳмадшоҳ Масъудро солҳо қабл дар яке аз фурӯшгоҳҳои Кобул харида буд. Ба таъкиди ӯ, дар рӯзи охири ҳузураш дар Афғонистон кормандони амнияти Толибон дар вақти кофтукови ашёи ӯ ин тасвирҳоро ёфтанд ва чанд иттиҳом бар зиддаш эълон намуданд. Ба гуфтаи ӯ, Толибон ӯро ба қочоқи ашёи қиммат, омӯзиши забони форсӣ, узвият ба гурӯҳи ДОИШ, доштани акси Аҳмадшоҳ Масъуд ва ҷосусӣ боздошт карданд.

Ӯ ин иттиҳоми Толибонро беасос ва сохта номид.

Этнограф ва пажӯҳишгари рус гуфт Толибон қаблан бо сабаби сафарҳои зиёди ӯ ба Афғонистон нисбаташ парванда боз карда буданд, вале ҳуҷҷатҳои кофӣ барои боздошти расмӣ надоштанд. Ӯ ин ҳодисаро натиҷаи “қарори худсаронаи кормандони маҳаллии Толибон” донист.

Этнографи рус, ки барои ҷамъоварии маводҳои илмӣ оид ба фарҳанги Афғонистон ба ин кишвар рафта буд, моҳи июли соли 2025 боздошт ва наздик ба як моҳ аз сарнавишташ иттилое дар даст набуд. Ӯ ҳафтаи гузашта ба Русия баргашт. Мақомоти Русия озодии ӯро натиҷаи робитаҳои хуб бо Толибон арзёбӣ намуданд.

“Ҳама ашёи қимматбаҳоям дар зиндони Толибон гум шуданд” – гуфт мардумшиноси рус.

Ин мардумшиноси рус, ки 52 рӯз дар асорати Толибон қарор дошт, дар мусоҳибаи тозааш гуфт, ки ҳама ашёи қимматбаҳояш дар зиндон нопадид шудаанд.

“Бо вуҷуди ваъдаи Толибон, ки ҳатто сӯзан ҳам зоеъ намешавад, тамоми ашёям, ҳатто сӯзанбозкунаки телефони ҳамроҳам гум шуд”- гуфт мардумшиноси рус.

Ба гуфтаи ӯ, ду ҷомадонаш бо ашёи қимматбаҳо ба арзиши 300 доллар ва туҳфаҳо барои дӯстонаш нопадид шудаанд: “Повербанк, зарядники ноутбук, диск ва корти хотираҳо ҳама аз миён рафтанд”.

Ӯ лаҳзаи боздошташро чунин шарҳ дод: “Дар дарвозаи шаҳр будам, ки як корманди амният аз хадамоти иктишофӣ, аз ман шиноснома пурсид. Ба ӯ гуфтам, ки шиноснома надорам ва фақат паспорт дорам. Паспортро нишон додам, ӯ онро дид, баъдан телефони ҳамроҳи маро гирифта гуфт, ки панҷ дақиқа вақт мегирад. Сипас, дар ҷараёни кофтукови сахт иттиҳомҳои беасос бар зиддам эълон шуд”.

Dialog.tj