Нахустин бастаи кумакҳои башардӯстонаи Ҷумҳурии Тоҷикистон барои зилзилазадагони шарқи Афғонистон ба вилояти Нангарҳор расид.

Бино ба иттилои “Афғонистон интернешнл” ин бастаҳои се ҳазор тонӣ, ки шомили маводи хӯрокӣ ва ғайрихӯрокӣ аст, бо 9 камаз ба шаҳри Ҷалолобод интиқол ёфтааст. Масъулони Толибон мегӯянд, ки 110 камази дигар кумакҳои Тоҷикистон дар роҳи расидан ба Афғонистон аст.

Дафтари раиси вилояти Нангарҳор рӯзи якшанбе, 14-уми сентябр иттилоъ дод, ки кумакҳои башардӯстонаи Тоҷикистон ба воситаи Саид Шарифӣ, сафири ин кишвар дар Афғонистон ба Азизуллоҳ Мустафо, муовини раиси вилояти мазкур супурда шуд.

Тибқи иттилоъ, кумакҳои Тоҷикистон шомили 120 камаз аст, ки то ҳоло 9 камази он ба шаҳри Ҷалолобод расидааст. Кумакҳои Тоҷикистон аз семент, арматура, тахта, хайма, биринҷ, шакар, рӯған, қаймоқ, макарон ва дигар маводи аввалия иборат аст.

Сафири Тоҷикистон дар Афғонистон Саид Шарифӣ гуфт, ки Тоҷикистон кумакҳои башардӯстонаи худ ба мардуми зарардидаи Афғонистонро идома медиҳад. Ӯ изҳори ҳамдардии Президенти Тоҷикистонро ба мардуми зарардидаи Афғонистон расонидааст.

Dialog.tj