Раёсати Вазорати корҳои дохилӣ дар шаҳри Душанбе аз боздошти ҷавоне хабар медиҳад, ки қаблан панҷ маротиба бо ҷурми дуздӣ дастгир шуда буд.

Ба иттилои манбаъ, аз ҷониби кормандони Шуъбачаи шаҳрии милитсияи ШВКД-1 дар ноҳияи Фирдавсӣ, Меҳроҷи Назирмад бо гумони дуздӣ дастгир карда шуд.

Гуфта мешавад, ки номбурда қаблан панҷ маротиба бо ҷурми дуздӣ суд шудааст ва инак бори шашум дастгир гардидааст. 

Манбаъ меафзояд, ки тафтишоти пешакӣ муайян намудааст, ки Меҳроҷи Назирмад дар ҳудуди ноҳияи Фирдавсӣ аз дохили воситаҳои нақлиёт маблағҳои пулӣ, телефони мобилӣ ва дигар ашёҳои арзишмандро тасарруф мекардааст.

Дар ҳоли ҳозир ду далели дуздии Меҳроҷи Назирмад ошкор карда шуда, тафтишот идома дорад.

Ҳамчунин, РВКД дар шаҳри Душанбе аз шаҳрвандон хоҳиш кардааст, ки агар аз ин нафар ҷабр дидаанд, тавассути рақамҳои (+992) 018-02-02-02 муроҷиат намоянд.

Dialog.tj