Тавре ки маркази матбуоти раиси вилояти Хатлон хабар диҳад, имрӯз, 11-уми сентябр раиси вилояти Хатлон Давлаталӣ Саид ба даҳ оилаи ниёзманд ва бесаробон хонаи истиқоматӣ тақдим намуд.

Гуфта мешавад, ки тақдими хонаҳои истиқоматӣ ба даҳ оилаи ниёзманд дар деҳаи Айлодараи ҷамоати деҳоти ба номи Ғаффор Мирзои ноҳияи Ховалинг, дар доираи сафари кории Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Ховалинг сурат гирифтааст.

"Зимни боздид аз аввалин хона хабар расид, ки Абдулло ном бачаи ин хонадон имрӯз зодрӯз доштааст. Раиси вилоят Давлаталӣ Саид бо ин оила ва махсусан бо Абдулло суҳбати самимӣ намуда, мукофотпулӣ ба ӯ тақдим намуданд. Инчунин, ба дигар кӯдакони оила сару либос ва лавозимоти таълим тӯҳфа гардид" - омадааст дар хабарнома.

Ҳамчунин, иттилоъ дода мешавад, ки ба раиси ноҳияи Ховалинг супориш дода шудааст, ки пайваста аз вазъи зиндагии сокинони ниёзманд огоҳ гардида нисбат ба эшон ғамхорӣ зоҳир карда шавад.

Dialog.tj