Сайид Аббос Ироқчӣ, Вазири корҳои хориҷии Ҷумҳурии Исломии Эрон дар як нишасти хабарии муштарак бо Вазири корҳои хориҷии Миср ва Раиси Агентии байналмилалии энергияи атомӣ (МАГАТЭ) гуфт, Эрон бо дастёбӣ ба як созиш бо ин ниҳод барои идома ва осон кардани ҳамкориҳо масъулиятшиносӣ ва хештандории худро нишон медиҳад. Ҳарчанд, ба гуфтаи ӯ, “амалиёти ғайриқонунӣ ва таҷовузкоронаи Иёлоти Муттаҳидаи Амрико ва Исроил” вазъиятро барои Эрон душвор сохтааст.

Сайид Аббос Ироқчӣ гуфт, ки ин музокира барои таҳияи як механизми нави иҷрои уҳдадориҳои Эрон дар доираи муқаррароти NPT анҷом ёфт ва ниҳоятан ба натиҷа расид. Ӯ гуфт, ки ин созиш ба таври комил бо қонуни Маҷлиси Шурои исломӣ мувофиқат дорад ва ҳам ҳифзи ҳаққи қонунии Эрон ва ҳам идомаи ҳамкории техникӣ бо Агентиро таъмин менамояд.

Вазири корҳои хориҷии Эрон ҳамлаи Исроил ба Давҳаи Қатарро “амалиёти террористӣ ва таҷовузкорона” номид ва аз Шӯрои амнияти СММ даъват кард, ки барои пешгирӣ аз “ҷинояти бештар” бар зидди Ғазза иқдом кунад.

Сайид Аббос Ироқчӣ гуфт, ки Эрон бо ҳифзи ҳаққи доштани энергияи атомии сулҳомез бо МАГАТЭ ва ҷомеаи ҷаҳонӣ “гуфтугӯ ва ҳамкорӣ мекунад”. Ӯ ҳушдор дод, агар ҳар гуна иқдоми душманона бар зидди Эрон такрор шавад, қадамҳои амалии қабулшуда дигар иҷро нахоҳанд шуд.

Dialog.tj