Дар ноҳияи Ашт ба пешвози 35-солагии Истиқлоли давлатӣ ва дар доираи Соли рушди саноат (2022-2026) як қатор корхонаҳои нави истеҳсолӣ ба фаъолият оғоз намуданд, ки даҳҳо сокини маҳаллиро бо ҷойи кори доимӣ таъмин мекунанд.

Бар асоси иттилои дафтари матбуоти Раиси вилояти Суғд Ҷамъияти дорои масъулияташ маҳдуди “Комплекси агросаноатии Ашт” корхонаҳои дӯзандагӣ, ҷӯроббарорӣ ва истеҳсоли зарфҳои пластикиро фаъол намудааст.

Корхонаи зарфҳои пластикӣ, ки бо таҷҳизоти муосири чинӣ муҷаҳҳаз мебошад, дар як шабонарӯз то 2500 адад зарф истеҳсол мекунад. Ба гуфтаи масъулини корхона ин зарфҳо асосан барои содироти гелос ва хушккунии зардолу истифода мешаванд ва маҳсулоти он хосияти воридотивазкунанда дорад.

“Мо кӯшиш дорем, ки талаботи бозори дохилӣ ва ҳамчунин, кишоварзонеро, ки ба содироти маҳсулоти худ машғул мебошанд, таъмин созем. Ин иқлом ба кам кардани вобастагӣ аз воридот мусоидат мекунад"”- гуфт масъули корхона.

Дар корхонаи дӯзандагӣ занон ва духтарони маҳаллӣ бо ҷойи кори доимӣ таъмин шудаанд. Онҳо асосан ба дӯхтани либосҳои гуногун машғул мебошанд. “Барои бисёри мо ин на фақат сарчашмаи даромад, балки имкони такмил додани ҳунару маҳорат низ мебошад”- гуфт яке аз кормандони корхона.

Корхонаи ҷӯроббарорӣ бошад, иқтидори истеҳсоли 10 ҳазор ҷуфт ҷӯробро дар як шабонарӯз дорад. Ҳоло дар он 50 нафар сокини маҳаллӣ фаъолият мекунанд.

Ба гуфтаи намояндагони мақомоти маҳаллӣ рушди саноат дар ноҳия фақат ба таъмини шуғли аҳолӣ хидмат намекунад, балки заминаи содироти маҳсулот ва афзоиши Маҷмуи маҳсулоти дохилиро низ фароҳам меорад. “Саноат соҳаи калидии иқтисодиёт аст ва пешрафти он мавқеи Тоҷикистонро дар бозори байнаалмилал устувор месозад”- зикр мекунад намоядаи ноҳияи Ашт.

Dialog.tj