Раёсати Вазорати корҳои дохилӣ дар шаҳри Душанбе аз боздошти як сокини 34-солаи пойтахт хабар дод, ки дар содир намудани якчанд ҷинояти дуздӣ гумонбар дониста мешавад.

Ба навиштаи манбаъ, дар натиҷаи баррасии аризаҳои шикоятӣ, Салимов Муслимҷон, сокини 34-солаи шаҳри Душанбе аз ҷониби кормандони ШВКД-1 дар н.Фирдавсӣ дастгир карда шуд.

Гуфта мешавад, ки зимни санҷиш муайян гардид, ки номбурда дар беморхонаи "Истиқлол" бо ҳар баҳона телефонҳои мобилии шаҳрвандонро гирифта, тариқи пинҳонӣ аз ҳамёни электронии онҳо маблағҳои гуногуни пулиро тасарруф мегардааст. Аз ҷумла, аз ҳамёни электронии Баротов Д. 15 ҳазор сомониро пинҳонӣ ба ҳамёни электронии худ интиқол дода, аз ҷойи ҳодиса фирор кардааст.

Дар ҳоли ҳозир гумонбаршаванда дар ҳабси пешакӣ қарор дошта, мақомот мегӯяд, ки касе агар аз ин нафар ҷабр дидааст, тариқи рақамҳои (+992) 018-02-02-02 ба милитсияи пойтахт муроҷиат намояд.

Dialog.tj