Беш аз 28 сомонӣ сари кас. Нархномаи хизматрасонии оби нӯшокӣ гарон шуд

Корхонаи вохиди давлатии "Обу корези Душанбе" хабар медиҳад, ки дар асоси Қарори раиси шаҳри Душанбе, аз 1-уми сентябри соли равон нархномаи хизматрасонии таъминоти оби нӯшокӣ ва рафъи обҳои партов барои ҳамаи истифодабарандагони пойтахт гарон мешавад.

Гуфта мешавад, ки шурӯъ аз сентябр арзиши хизматрасонӣ барои таъминоти оби нӯшокӣ ва рафъи обҳои партов чунин муқаррар гардидааст:

Бо ҳисобкунак:

- аҳолӣ: 2,60 сомонӣ барои 1 м³;

- ташкилотҳои буҷетӣ: 3,59 сомонӣ барои 1 м³;

- ташкилотҳои тиҷоратӣ: 9,10 сомонӣ барои 1 м³;

Тартиби пардохт барои муштариёне, ки бо ҳисобкунаки обӣ насб нашудаанд, дар асоси Қарори Ҳукумати Ҷумҳурии Тоҷикистон аз 30 апрели соли 2011, №234 чунин муқаррар шудааст (сарикасӣ дар як моҳ барои 1 нафар):

- биноҳои баландошёна — 28,07 сомонӣ;

- ҳавлиҳои хусусии бо об ва канализатсия таъминбуда — 23,39 сомонӣ;

- хонаҳое, ки аз калонка ё ҷӯмакҳои наздиҳавлигӣ истифода мебаранд — 7,41 сомонӣ.