Доналд Трамп, Президенти Иёлоти Муттаҳидаи Амрико, роҳбарони Чин, Русия ва Кореяи Шимолиро ба ҳамдастӣ ва тавтеа бар зидди Амрико айбдор кард.

Президенти Амрико рӯзи гузашта дар шабакаи иҷтимоии худ навишт, ки Си Ҷинпин, Президенти Чин, Владимир Путин, Президенти Русия ва Ким Чин Ин, роҳбари Кореяи Шимолӣ имрӯзҳо дар Чин “машғули тавтеа бар зидди Амрико” мебошанд.

“Саломҳои гарми маро ба Владимир Путин ва Ким Чин Ин расонед, дар ҳоле ки шумо бар зидди Амрико тавтеа мекунед”- навишт Доналд Трамп.

Ин изҳороти Доналд Трамп дар ҳоле садо медиҳад, ки роҳбарони Русия ва Кореяи Шимолӣ дар паради бузурги низомии Чин дар Пекин ширкат намуданд. Чин ин паради ҳарбиро ба ифтихори анҷоми Ҷанги ҷаҳонии дуюм ва пирӯзӣ бар Ҷопон доир намуд, ки як қатор роҳбарони кишварҳо низ дар он ҳузур доштанд.

Қаблан Владимир Путин, Президенти Русия Си Ҷинпин, Президенти Ҷумҳурии Мардумии Чинро “дӯсти қадимӣ” –и худ номида буд.

Ин дар ҳолест, ки як рӯз қабл аз ин роҳбарони тақрибан 20 кишвар дар нишасти Созмони ҳамкории Шанхай дар Чин ба зарурати мубориза бо якҷонибагароии ҷаҳонӣ таъкид карда буданд.

Dialog.tj