Си Ҷинпин, Президенти Ҷумҳурии мардумии Чин дар марсоми ифтитоҳи нишасти сарони кишварҳои узви Созмони ҳамкории Шанхай “зеҳнияти ҷанги сард” ва “сиёсати шантаж дар муносибатҳои байналмилалӣ”-ро маҳкум кард.

Ӯ зимни суханронӣ таъкид кард: “Дар шароите, ки вазъияти ҷаҳон ҳарчӣ бештар печида ва ноором мешавад, кишварҳои узв бо чолишҳои амниятӣ ва рушд рӯз то рӯз сахттар рӯ ба рӯ мешаванд”.

Ӯ афзуд, ки Чин таъсиси Бонки рушди Созмони ҳамкории Шанхайро суръат мебахшад ва ваъда дод, ки дар се соли оянда ба кишварҳои узви ин Созмон 1, 4 миллиард доллар қарз ихтисос медиҳад.

Си Ҷинпин ҳамчунин, таъкид кард, ки кишварҳои узви Созмони ҳамкории Шанхай бояд “бо тафаккури ҷанги сард, сиёсати тарсодан ва зӯргӯӣ бар асоси блокҳо муқобила кунанд ва аз низоми байналмилалӣ бо меҳварияти Созмони Милали Муттаҳид ҳимоят намоянд”.

“Низоми тиҷорати бисёрҷонибаро тақвият диҳанд, аз бисёрқутбӣ шудани баробар ва мунтазам ҳимоят кунанд, ҷаҳонишавии фарогири иқтисодиро пеш баранд ва низоми идоракунии ҷаҳониро одилона ва минтиқитар созанд”- таъкид кард Си Ҷинпин.

Бар асоси гузориши расонаҳо Си Ҷинпин бо маҳкум намудани зеҳнияти ҷанги сард, ба таври ғайримустақим ба сиёсатҳои сахтгиронаи ИМА нисбат ба Чин ва қатъи буҷаи баъзе аз ниҳодҳои вобаста ба СММ аз сӯи Вашингтон ишора намуд.

Ба гуфтаи таҳлилгарон Чин қасд дорад, аз нишасти Созмони ҳамкории Шанхай ба ҳайси абзоре барои пешниҳоди алтернатива ба низоми ҷаҳонии таҳти роҳбарии ИМА истифода кунад.

Dialog.tj