Нарендра Моди, сарвазири Ҳиндустон дар мулоқоти дуҷонибаи худ бо Президенти Русия Владимир Путин рӯзи душанбе аз талошҳои ахир барои ҳалли низои Украина истиқбол намуда, таъкид кард, ки тамоми инсоният поёни ҷанг ва барқарории сулҳу суботро мехоҳад.

Ӯ, ҳамчунин, аз ҷонибҳои даргир даъват кард, ки “бо руҳияи созанда” роҳи ҳалли низоъро идома диҳанд.

“Мо аз тамоми талошҳои ахир дар самти ҳалли низоъ истиқбол мекунем. Умедворем, ки тамоми ҷонибҳои зиддахл бо руҳияи созанда қадамҳои минбаъдаро хоҳанд гузошт. Мо бояд ҳарчӣ зудтар роҳи поёни низоъро пайдо кунем, то субот ва сулҳи минтақавӣ барқарор гардад. Ин фараёди тамоми инсоният аст”- зикр кард Нарендра Моди.

Баъди мулоқот бо Путин сарвазири Ҳиндустон Нарендра Моди дар шабакаи “Х” навишт: “Мулоқоти олӣ бо Президент Путин дар ҳошияи нишасти Созмони ҳамкории Шанхай дар Тянҷин анҷом додем”.

Нарендра Моди афзуд, ки ҷонибҳо роҳҳои “густариши ҳамкории дуҷониба дар тамоми соҳаҳо”, аз ҷумла тиҷорат, нуриҳо, ҳифзи муҳити зист, амният ва фарҳангро баррасӣ карданд.

“Мо ҳамчунин, назари худро дар хусуси масъалаҳои минтақавӣ ва ҷаҳонӣ, аз ҷумла роҳи сулҳомези ҳалли низои Украина мубодила кардем. Шарикии стратегии махсус ва имтиёзноки мо сутуни муҳимми суботи минтақавӣ ва ҷаҳонӣ боқӣ мемонад”- афзуд сарвазири Ҳиндустон Нарендра Моди

Қабл аз мулоқот ду роҳбар ба толори баргузории мулоқоти дуҷониба бо як мошин омадаанд.

Путин дар ҷараёни суханронии худ дар нишасти Созмони ҳамкории Шанхай таъкид кард, ки саҳми Ҳиндустон ва дигар шарикони стратегӣ дар мусоидат ба ҳалли низои Украина хеле арзишманд аст.

“Мо кӯшиш ва пешниҳодҳои Чин, Ҳиндустон ва дигар шарикони стратегии худро, ки барои мусоидат ба ҳаллу фасли буҳрони Украина равон шудаанд, хеле арзишманд мешуморем”- зикр кард Владимир Путин.

Сарвари Русия ёдовар шуд, ки “созишномаҳо”-е, ки ӯ бо Президенти Амрико Доналд Трамп дар як нишасти моҳи август ба даст овард, роҳи сулҳ дар Украинаро боз кардаанд.

Dialog.tj