Дар ҳоле, ки ихтилофоти тиҷоратӣ бо Вашингтон авҷ гирифтаанд, сарвазири Ҳиндустон Нарендра Модӣ рӯзи якшанбе дар мулоқот бо Президенти Чин Си Ҷинпин гуфт, ки Деҳлӣ ба таҳкими муносибатҳо бо Пекин содиқ мемонад.

Ин мулоқот дар шаҳри Тянҷини Чин маҳз дар замоне, ки Вашингтон ба воридоти Ҳиндустон 50 фоиз боҷи иловагӣ ҷорӣ кардааст, доир шуд. Ба гуфтаи таҳлилгарон, ин қадамҳои Амрико баъд аз хариди нафти Русия аз ҷониби Ҳиндустон роҳандозӣ шудааст.

Нарендра Модӣ баъд аз 7 соли танаффус ба Чин рафт, то дар нишасти дурӯзаи Созмони ҳамкории Шанхай ширкат кунад. Ин нишаст, ки ба гуфтаи нозирон рамзи ҳабастагии ҷаҳони ҷанубӣ ҳисобида мешавад, бо ҳузури Владимир Путин ва роҳбарони Осиёи Марказӣ ва Ҷанубу Шарқи Осиё баргузор гардид.

Вазорати корҳои хориҷии Ҳиндустон дар изҳороте таъкид кард, ки Нарендра Модӣ дар мулоқот бо Си Ҷинпин гуфт: “Ҳинд ва Чин роҳи мустақили стратегии худро пайгирӣ мекунанд ва муносибатҳои ду кишвар набояд аз нигоҳи кишвари сеюм арзёбӣ шаванд”.

Ҳамзамон роҳбарони ду қудрат дар хусуси афзоиши ҳамкориҳои тиҷоратӣ ва сармоягузорӣ, густариши ҳамкориҳои минтақавӣ ва бархӯрд бо таҳдидҳое чун терроризм табодули назар намуданд.

Ба назари бисёре аз коршиносон Нарендра Модӣ ва Си Ҷинпин бо чунин мавқеъгирӣ қасд доранд нишон диҳанд, ки Пекин ва Деҳлӣ омодаанд дар муқобили фишорҳои рӯзафзуни Ғарб як ҷабҳаи муттаҳидро ба намоиш гузоранд.

Dialog.tj