Масъулони Ҷумҳурии Исломии Эрон мегӯянд, ки дар давоми 100 рӯзи гузашта беш аз 1 миллион шаҳрванди Афғонистонро аз ин кишвар депорт кардаанд. Муҳаммадсодиқ Муътамадин, як масъули ҳукумат дар Теҳрон гуфтааст, ки аз шаҳри Теҳрон тақрибан 400 ҳазор нафар ба Афғонистон баргардонда шуданд. Ӯ дар нишасти хабарӣ гуфт, ки ин рақамҳо ҳам муҳоҷирони ба ихтиёри худ ва ҳам афроди бозошдоштшуда аз ҷониби неруҳои амниятиро дар бар мегирад.

Ӯ афзуд, ки аз миёни муҳоҷирон беш аз 140 ҳазор донишомӯз низ аз мактабҳои шаҳри Теҳрон хориҷ шудаанд. Ба гуфтаи ӯ, соли гузашта тақрибан 2020 ҳазор донишомӯзи муҳоҷир дар мактабҳои ин вилоят таҳсил мекарданд, вале баъд аз оғози барномаи депорт, ин шумора ба 80 ҳазор нафар афзоиш ёфтааст.

Ин масъули эронӣ гуфт, ки қаблан барои таълими донишомӯзони муҳоҷир тақрибан 6 ҳазор синфи махсус ҷудо шуда буд. Ҳоло ин имконот барои хонандагони эронӣ истифода мешавад. Ӯ, ҳамчунин, таъкид кард, ки 50 фоизи муҳоҷирони афғон дар вилояти Теҳрон зиндагӣ мекунанд. Бар асоси барномаи ҳукумати Масъуд Пизишкиён марҳилаи ихроҷи муҳоҷирони ғайриқонунӣ оғоз шудааст.

Ин дар ҳолест, ки муҳоҷирон мегӯянд, ҳатто бо доштани санадҳои қонунии иқомат, аз ҷумла виза боздошт ва маҷбуран ихроҷ мешаванд. Созмонҳои байналмилалӣ чандин маротиба боз гардондани маҷбурии муҳоҷирон ба Афғонистонро нақзи қонунҳои байналмилалӣ хондаанд. Раванди ихроҷи муҳоҷирони афғон аз Эрон ҳанӯз идома дорад.

Dialog.tj