Аз оғози ҷанг дар Ғазза 189 журналисти фаластинӣ – марду зан, журналистони озод ва кормандони расонаҳо ҷони худро аз даст додаанд. Қисме аз ин журналистон дар хона ва қисми дигар дар вақти анҷоми вазифаи корӣ кушта шудаанд.

Хабаргузории “Associated Press” рӯзи сешанбе, 26-уми августи соли 2025 хабар дод, ин омор бар асоси иттилои Кумитаи ҳифзи рӯзноманигорон дар Ню-Йорк пешниҳод шудааст ва рӯзноманигоронеро, ки дар беморхонаҳо, паноҳгоҳҳои муваққатӣ ё ҳангоми сабти рӯйдодҳои хушунатбор кушта шудаанд, дар бар мегирад.

Гузоришҳо нишон медиҳанд, ки бисёре аз ин рӯзноманигорон, ба мисли аҳолии одии Ғазза дар шароити мушобеҳ – гуруснагӣ ва кӯчманчигӣ, қарор доштаанд.

Исроил баъзе аз рӯзноманигоронро барои иртибот доштан бо гурӯҳҳои мусаллаҳ, аз ҷумла Ҳамос ва Ҷиҳоди Исломӣ муттаҳам кардааст, вале худи журналистон ва расонаҳо ин иттиҳомро рад кардаанд.

Дар ҳамлаи ахири Исроил ба як бемористон дар Навори Ғазза 4 рӯзноманигори дигар кушта шудаанд. Ин ҳамлаи Исроил вокунишҳои шадиди байналмилалиро дар пай дошт. Ҳатто ҳомии Исроил Амрико дар изҳоре гуфт, ки аз ҳамла ба бемористони Нисо дар Ғазза сахт мутассир шудааст.

Dialog.tj