Вазорати тандурустӣ ва ҳифзи иҷтимоии аҳолии Тоҷикистон маъракаи иловагии эмгузаронӣ бар зидди сурхчаро оғоз намудааст. Бар асоси иттилои расмӣ маъракаи эмгузаронӣ аз 25-уми август то 6-уми сентябр дар шаҳри Душанбе, Ваҳдат, Ҳисор, ноҳияҳои Рӯдакӣ, Варзоб, Қубодиён, Данғара, Шаҳритус, Кӯшониён, Восеъ, Вахш, Фархори вилояти Хатлон, ҳамчунин, дар шаҳри Панҷакент ва Исфараи вилояти Суғд доир мешавад.

Бар асоси ин барнома кӯдакони аз 6-моҳа то 5-сола, онҳое, ки аз 6-уми сентябри соли  2020 то 6-уми марти соли 2025 таваллуд шудаанд, аз маъракаи эмгузаронӣ мегузаранд. Ба гуфтаи масъулини Вазорат мақсади асосӣ пешгирии паҳншавии бемориҳои сироятии хавфнок мебошад.

Доир ба ин масъала рӯзи 26-уми август дар Вазорати тандурустӣ маҷлиси корӣ бо ширкати Абдухолиқ Амирзода, муовини Вазир ва роҳбарони сохторҳои тиббӣ баргузор гардид. Дар ин маҷлис таъкид шуд, ки  чораҳои пешгирӣ ва фаро гирифтани бештари кӯдакон ба маъракаи эмгузаронӣ суръат бахшида шавад.

Бар асоси гуфтаи мутахассисон бемории сурхакон бемории сироятӣ буда, барои кӯдаконе, ки эм нашудаанд, хавфи ҷиддӣ дорад.  Маъракаи имсол бахше аз Рӯзҳои миллии эмгузаронӣ аст, ки ҳамасола дар саросари кишвар амалӣ мегардад.

Dialog.tj