Элиза Пинёл, сафири фавқулода ва мухтори Ҷумҳурии Фаронса ба шаҳри Панҷакент сафар намуда, бо роҳбарияти шаҳр масъалаи густариши ҳамкориҳои фарҳангӣ, сайёҳӣ, шаҳрсозӣ ва омӯзиши забони фаронсавӣ дар мактабҳоро мавриди баррасӣ қарор дод.

Сафири Фаронса дар мулоқот бо раиси шаҳри Панҷакент Абдухолиқ Холиқзода масъалаҳои муҳимми ҳамкории дуҷонибаро мавриди баррасӣ қарор дод. Дар мулоқот бо ишора ба ҳамкории дерин ва пурсамари гурӯҳи бостоншиносони фаронсавӣ дар ёдгориҳои таърихии Саразм, таъкид гардид, барои ҳифз ва таҳқиқи илмӣ ҳамкориҳо бояд густариш дода шаванд.

Дар ҷараёни мулоқот ба барномаҳои фарҳангӣ, аз ҷумла дастгирии таълим ва омӯзиши забони фаронсавӣ дар мактабҳо ва донишгоҳҳои шаҳр таваҷҷуҳи махсус зоҳир гардид. Дурнамои ҳамкориҳои иқтисодӣ бо ширкати соҳибкорони фаронсавӣ, рушди сайёҳӣ, меъморӣ ва шаҳрсозӣ, коркарди маҳсулоти кишоварзӣ, ҷамъоварӣ ва коркарди партовҳои маишӣ мавриди гуфтугӯи ду ҷониб қарор гирифт.

Ҷонибҳо дар фарҷоми мулоқот қарор намуданд, ки “Харитаи роҳ” барои самтҳои афзалиятнок, аз ҷумла барномаҳои муштараки фарҳангӣ, эҷоди шароит барои ҷалби сармоя ба инфрасохтори сайёҳии Панҷакент тартиб дода шавад.

Сафири Фаронса дар ин мулоқот зарфияти шаҳр ва ёдгориҳои таърихии он, ҳамчунин, дурнамои мусоид барои густариши лоиҳаҳои дуҷонибаро муҳим арзёбӣ кард.

Dialog.tj