Бахши таҳримҳои Шурои амнияти Созмони Милали Муттаҳид тасдиқ кард, ки Ҳинд дархости худ барои маофияти сафар ба Амирхон Мутаққӣ, вазири корҳои хориҷии ҳукумати Толибонро пас гирифтааст. Ин сафар бояд аз 27-ум то 29-уми август ба Ню-Деҳлӣ анҷом дода мешуд.

Сарчашмаҳои дипломатӣ гуфтаанд, ки қаблан Ҳинд барои гирифтани иҷозатнома ба кумитаи таҳримҳои Созмони Милали Муттаҳид муроҷиат карда ва Амирхон Мутаққиро ба сафар даъват карда буд. Вале, ба гуфтаи манбаъҳо, мухолифати Амрико боиси бозпас гирифтани ин дархост шудааст.

Қабл аз ин, фишори Амрико боис шуд, ки Шурои амният ба сафар кардани Мутаққӣ ба Покистон розӣ нашавад ва он сафар лағв гардад.

Номи Амирхон Мутаққӣ дар феҳристи таҳримҳои Шурои амният тибқи қатъномаи 1988 ҷой дорад, ки манъи сафар барои мақомдорони Толибонро дар бар мегирад. Фақат дар ҳолатҳои махсус, монанди нишастҳои расмӣ гуфтушунидҳои сулҳ ё табобати таъҷилӣ бо тасдиқи кумита метавон иҷозаи сафар гирифт.

Dialog.tj