Дар натиҷаи ҳамлаҳои ҳавоии Исроил ба беморхонаи Носир дар шаҳри Хон-Юнус дар ҷануби Навори Ғазза 15 нафар, аз ҷумла 4 хабарнигор кушта шудаанд. Дар миёни кушташудаҳо як нафар корманди ҳолатҳои фавқулода низ будааст.

Сухангӯи ҳолатҳои фавқулодаи Ғазза гуфт, ҳамлаи нахуст бо истифода аз дрон сурт гирифт ва сипас, бо бомбаборон идома ёфт. Ин дар ҳолест, ки кормандони беморхона машғули интиқоли маҷруҳон будаанд.

Иттиҳодияи журналистони Фаластин ин хабарро тасдиқ кард ва исми рӯзноманигорони кушташударо эълон сохт. Бар асоси иттилоияи ин ниҳод Ҳусом Мисрӣ, Муҳаммад Салама, Марям Абудаға, Муоз Абудтоҳа дар ин ҳамла кушта шуданд. Ҳамчунин, “Ассошейтед пресс” гуфтааст, ки Марям Абудаға ба ҳайси хабарнигори озод бо онҳо ҳамкорӣ мекард.

Хабаргузории “Рейтерз” низ иттилоъ дод, ки яке аз хабарнигоронаш дар миёни кушташудагон ва як нафари дигар дар миёни маҷруҳон қарор дорад.

“Франс пресс” менависад, бинобар маҳдудиятҳои ҷиддӣ ва мушкилоти дастрасӣ ба маҳалҳо дар Ғазза онҳо наметавонанд мустақилона ин оморро тасдиқ ё рад кунанд. Артиши Исроил гуфтааст, ки дар робита ба ин ҳамлаҳо таҳқиқотро оғоз мекунад.

Ин ҳамла дар ҳоле рух дод, ки аввали ҳамин моҳ дар наздикии беморхонаи “Шифо” дар шаҳри Ғазза чор корманди “Ал-Ҷазира” ва ду хабарнигори озод дар ҳамлаи ҳавоии Исроил кушта шуда буданд. Кумитаи ҳимоят аз хабарнигорон ва “Гузоришгарони бидуни марз” қаблан гуфта буданд, ки аз оғози ҷанги Ғазза то ҳоло наздик ба 200 хабарнигор ҷони худро аз даст доданд.

Dialog.tj