Вазорати мудофиаи Ҷумҳурии Тоҷикистон намунаи нави либосҳои ҳарбиро муаррифӣ кард, ки ба гуфтаи масъулони он ба шароити иқлимии кишвар созгор мебошад.

Бар асоси иттилои маркази матбуоти Вазорат ин либоси нав бо назардошти интихоби матоъҳои мувофиқ ва шакли дӯхти муносиб омода шудааст, ки барои хизматчиёни ҳарбӣ дар шароити гарм ва кӯҳистонӣ роҳат мебошад.

Дар машварти корӣ, ки бо ширкати роҳбарияти Қувваҳои мусаллаҳ, намояндагони шӯрои амният, Гвардияи миллӣ, Кумитаи ҳолатҳои фавқулода, Қӯшунҳои сарҳадӣ ва дигар сохторҳои қудратӣ доир шуд, зикр гардид, ки ин либос ҳамчун намунаи либоси ягонаи миллӣ барои хизматчиёни ҳарбӣ ва кормандони мақомоти ҳифзи ҳуқуқ истифода хоҳад шуд.

Вазорат қайд кард, ки дар вақти таҳия на фақат стандартҳои ҳарбӣ, балки унсурҳои миллӣ низ ба назар гирифта шудаанд, то рамз ва худшиносии Тоҷикистонро бозтоб диҳанд.

“Либоси ҳарбӣ на фақат ҷузъи хидмати ҳаррӯза, балки рамзи шараф, эҳтиром ва намояндагии давлат дар сатҳи байналмилалӣ аст”- зикр мешавад дар изҳороти Вазорат.

Мақомот илова мекунанд, ки корҳо дар хусуси такмил додани либоси ҳарбӣ аз солҳои истиқлолият оғоз шуда, бо супориши Сарфармондеҳи олии Қувваҳои мусаллаҳ – Президенти Ҷумҳурии Тоҷикистон Эмомалӣ Раҳмон идома дорад.

Dialog.tj