Имрӯз дар минтақаи миллии сайёҳии “Аваза” мулоқоти сатҳи баланд миёни ҳайатҳои Ҷумҳурии Туркманистон, Ҷумҳурии Озарбойҷон ва Ҷумҳурии Ӯзбекистон оғоз шуд.

Тибқи иттилоъ, Гурбангулӣ Бердимуҳаммадов, Роҳбари миллӣ ва Раиси халқ маслиҳати Туркманистон ба ин минтақа сафар карда, дар мулоқот ширкат кард. Ҳамчунин, Президенти Ҷумҳурии Озарбойҷон Илҳом Алиев ва Президенти Ҷумҳурии Ӯзбекистон Шавкат Мирзиёев барои ширкат дар ин ҳамоиши сатҳи баланд ба Туркманистон сафар намуданд.

Мақомот мегӯянд, ки ин рӯйдоди байналмилалӣ ба густариши муносибатҳои кишварҳои минтақа ва ба сатҳи сифатан нав баровардани ҳамкориҳо мусоидат мекунад. Туркманистон, Озарбойҷон ва Ӯзбекистон дар бахшҳои мухталиф, аз ҷумла сиёсӣ ва дипломатӣ, ҳамкориҳои самаранок доранд, ки барои таъмини сулҳ ва рушди устувор дар минтақа муҳим арзёбӣ мешавад.

Ташкил шудани ин мулоқоти сатҳи баланд дар соҳили Баҳри Хазар на фақат аҳамияти сиёсӣ дорад, балки ба таҳкими мақоми минтақаи миллии  сайёҳии “Аваза” ба ҳайси маркази баргузории чорабиниҳои муҳимми байналмилалӣ низ кумак мекунад.

Dialog.tj