Рустами Эмомалӣ, Раиси шаҳри Душанбе ва Раиси Маҷлиси миллии Маҷлиси Олии Ҷумҳурии Тоҷикистон аз зиёд шудани шумораи гирандагони таълимоти ғайриқонунии динӣ дар миёни ҷавонони тоҷик изҳори нигаронӣ намуда, ин равандро “ташвишовар” номид.

Рустами Эмомалӣ ин матлабро рӯзи 19-уми август дар ҷаласаи назоратӣ бо кормандони мақомоти ҳифзи ҳуқуқи пойтахт баён намуд. Мавсуф зикр кард, ки дар шаш моҳи соли равон шумораи беш аз 80 дарсади таълимгирандагони ғайриқонунии диниро ҷавонони то 30-сола ташкил медиҳанд.

Раиси шаҳри Душанбе зикр кард, ки барои пешгирии ҳамроҳшавии ҷавонон ва наврасон ба ҳизбу ҳаракатҳои ифротӣ ва пешгирии таблиғи фарҳанги бегона бояд чораҳои қатъӣ андешида шуда, корҳои фаҳмондадиҳӣ дар миёни аҳолӣ густариш дода шавад.

Ин нигаронӣ дар ҳоле зикр мешавад, ки Эмомалӣ Раҳмон, Президенти Ҷумҳурии Тоҷикистон рӯзи  9-уми марти соли 2024 дар ҷараёни суханронӣ бо фаъолон, намояндагони ҷомеа ва хидимони динии мамлакат зикр карданд “шахсоне, ки аз таҳсил дар муассисаҳои таълими динии ғайрирасмӣ ва шубҳаноки кишварҳои хориҷӣ бармегарданд, ба фазои динии Тоҷикистон афкори тундраву душманона ворид месозанд. Фақат соли 2023 300 ҳолати таълими ғайриқонунии динӣ ошкор ва ҷалби беш аз 4100 нафар пешгирӣ карда шудааст, ки аз вусъати раванди мағзшӯии кӯдакон, наврасон ва ҷавонон дарак медиҳад”.

Dialog.tj