20-уми август дар доираи даври якуми Ла Лигаи Испания бошгоҳҳои “Реал Мадрид” ва “Осасуна” дар варзишгоҳи “Сантяго Бернабеу”-и Мадрид бо ҳам рақобат карданд.

Тавре ки интизор мерафт, яъне дастаи шоҳона дар майдони худ ба дарвозаи “Осасуна” голи зиёд ворид мекунад, нашуд. Балки мизбонон танҳо дар дақиқаи 51-ум гол заданд ва он ҳам бошад аз зарбаи 11-метра. Муаллифи голи мазкур футболбози фаронсавӣ Килиан Мбаппе шуд.

Дар пасманзари зарбаи 11-метра ба дарвозаи “Осасуна” бархе расонаҳо навиштанд, ки бояд он таъин намешуд, зеро пойи футболбози “Осасуна” ба пойи Килиан Мбаппе нарасида буд.

Ҳамчунин, Килиан Мбаппе беҳтарин футболбози бозии мазкур эътироф гардид.

Пас аз вохӯрӣ, сармураббии бошгоҳи шоҳона Хаби Алонсо қаноатмандиашро аз бозии футболбозонаш изҳор дошта, гуфт, ки бо вуҷуди вақти кам доштан барои омодагӣ, ҳайати даста бозии хуб нишон дод.   

Dialog.tj