Дар пайи расонаӣ шудани бархе шикоятҳои волидон дар бобати лисоби мактабӣ, Вазорати маориф ва илми Ҷумҳурии Тоҷикистон вокуниш кард.

Манбаъ менависад, ки Вазорати маориф ва илми Ҷумҳурии Тоҷикистон дар раванди дӯхт, таъмин ва фурӯши либосҳои мактабӣ ва лавозимоти хониш иштирок надорад. Инчунин, тавассути мактубҳои инфиродӣ ба унвонии раёсату шуъбаҳои маориф пайваста эълон менамояд, ки дар дохили муассисаи таълимӣ хариду фурӯши либоси мактабӣ қатъиян манъ аст.

Дар иттилоияи Вазорат гуфта мешавад, ки масъулияти ташкили ярмаркаҳои фурӯши либос ва дигар лавозимоти зарурии мактабӣ ба дӯши Вазорати саноат ва технологияҳои нави Ҷумҳурии Тоҷикистон, Иттифоқи «Тоҷикматлубот», мақомотҳои иҷроияи ҳокимияти давлатии Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе ва шаҳру ноҳияҳои тобеи ҷумҳурӣ ва назорати сифати онҳо ба зиммаи Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон гузошта шудааст. Ярмаркаҳо берун аз муассисаҳои таълимӣ, дар марказҳои шаҳру ноҳияҳо ва ҷамоатҳои деҳот бояд баргузор шаванд, ки ҳадафи асосии онҳо фароҳам овардани шароити мусоид барои дастрасии хонандагон ба лавозимоти хониш мебошад.

Ҳамчунин, таъкид мегардад, ки дар сурати пайдо гардидани шикоятҳо вобаста ба сифати либосҳои мактабӣ ва фурӯши иҷбории он, шаҳрвандон бояд ба мақомоти масъулин муроҷиат намоянд.

Dialog.tj