Далер Ҷумъа, Вазири энергетика ва захираҳои оби Ҷумҳурии Тоҷикистон ва Журабек Мирзамахмудов, Вазири энергетикаи Ҷумҳурии Ӯзбекистон рӯзи 15-уми августи соли ҷорӣ дар шаҳри Гулистони вилояти Суғд масъалаҳои ҳамкориҳои дуҷонибаро баррасӣ намуданд.

Бар асоси иттилои расонаҳо дар мулоқот роҳбарон ва масъулони ширкатҳои сӯзишворӣ ва энергетикии ду кишвар ширкат намуда, масоили вобаста ба ҳамкориҳои энергетикиро баррасӣ карданд.

Вазирони ду кишвар ҳамчунин, ба ҳамоҳангсозии фаъолияти низомҳои энергетикии Тоҷикистону Ӯзбекистон дар мавсими тирамоҳ ва зимистони солҳои 2025-2026 таваҷҷуҳи хоса зоҳир карданд. Масъалаҳои техникии вобаста ба лоиҳаи “Пайвастшавӣ ба низоми ягонаи энергетикии Осиёи Марказӣ” мавриди гуфтугӯ ва муҳокима қарор гирифт.

Ду ҷониб таъкид карданд, ки ҳамкории энергетикӣ миёни ду кишвар, ки бо ташаббуси сарони кишварҳо – Эмомалӣ Раҳмон ва Шавкат Мирзиёев оғоз ёфтааст, бо суръат рушд мекунад ва ҳамаи самтҳои асосии соҳа, аз ҷумла интиқод, истеҳсол ва идоракунии энергияро фаро мегирад. Дар поёни нишаст вазирони ду кишвар аз сатҳи кунунии ҳамкориҳо изҳори умедворӣ карда, омодагии худро барои таҳким бахшидани муносибатҳои стратегӣ ва бародарона ба манфиати мардуми ҳарду кишвар тасдиқ намуданд.

Dialog.TJ