Бонки ҷаҳонӣ бар асоси омори нав гуфт, Тоҷикистон ва Ӯзбекистон баъд аз 100 сол ба гурӯҳи кишварҳои сарватманде шомил мешаванд, ки даромади солонаи баланд бар ҳар сари аҳолӣ доранд. Имрӯз ин нишондиҳанда барои чунин давлатҳо аз 14 ҳазор доллар боло мебошад.

Бар асоси гузориши таҳлилии Бонки ҷаҳонӣ, ки он ба суръат бахшидан ба рушди иқтисодӣ дар Аврупо ва Осиёи Марказӣ бахшида шудааст, кишварҳо аз рӯи сатҳи даромад ба чор гурӯҳ ҷудо мешаванд.

Кишварҳои сатҳи даромадашон паст, то 1,1 ҳазор доллар, пасттар аз миёна, 1,1 ҳазор то 1,5 ҳазор доллар, болотар аз миёна, 4,5  то 14 ҳазор доллар ва баланд, бештар аз 14 ҳазор доллар.

Бар асоси арзёбии мутахассисон нахустин кишварҳое, ки ба гурӯҳи кишварҳои дорои даромади сатҳи баланд шомил мешаванд, Туркманистон ва Қазоқистон хоҳанд буд. Бар асоси ҷадвале, ки дар ҳисобот зикр шудааст, ба ин ҳадаф онҳо дар камтар аз 30 сол мерасанд.

Тақрибан баъд аз 70 сол ба ин рӯйхт Қирғизистон низ ҳамроҳ хоҳад шуд. Ба ҳамин муҳлат, барои расидан ба сатҳи кишварҳои дорои даромади баланд Беларус ва Украина низ ниёз хоҳанд дошт.

Ба гуфтаи коршиносон барои Тоҷикистон ва Ӯзбекистон камтар аз як аср кофӣ нахоҳад буд. Ин кишварҳо фақат баъд аз сад сол метавонанд ба ин гурӯҳ шомил шаванд. Ба ҳамин гурӯҳи Бонки ҷаҳонӣ, ҳамчунин, Озарбойҷон низ дохил мешавад.

Гуфта мешавад, ин пешгӯӣ тибқи иттилои рушди иқтисодии кишварҳо дар даҳ соли ахир, аз ҷумла давраи буҳрони иқтисодӣ, ки аз пандемияи КОВИД 19 ба вуҷуд омад, омода шудааст.

Dialog.tj