Аз 1-уми октябри соли ҷорӣ дар Ҷумҳурии Тоҷикистон маъракаи нахустини эмгузаронӣ бар зидди вируси папилломаи инсон (ВПЧ) миёни духтарони аз 10 то 14-сола ба шакли ройгон гузаронида мешавад. Тибқи қарори Ҳукумати Ҷумҳурии Тоҷикистон, ки 24-уми июл қабул шуд, ин маърака як моҳ идома ёфта, то 31-уми октябр анҷом меёбад.

Бар асоси иттилои манбаъ, эмгузаронии духтарони 14-сола ба қисми доимии Барномаи миллии эмгузаронӣ дохил шуда ва ҳар сол гузаронида мешавад. Вазорати тандурустӣ ва ҳифзи иҷтимоии аҳолӣ вазифадор шуд, ки ваксинаро ба муассисаҳои тиббӣ ва мактабҳои кишвар сари вақт дастрас намояд.

Барои иҷрои ин қарор комиссияи ҷумҳурӣ таҳти роҳбарии муовини Сарвазир таъсис ёфтааст, ки ба он намояндагони ВОЗ ва ЮНИСЕФ низ шомил мешаванд.

ВПЧ гурӯҳи зиёда аз 200 намуди вирусро дар бар мегирад, ки бештар бо роҳи ҷинсӣ интиқол меёбанд ва метавонанд боиси бемориҳои гуногун шаванд. Баъзе аз навъҳои он хавфи пайдошавии саратон, аз ҷумла саратони гардани бачадон, вулва, маҳбал ва канали маъқадро бештар мекунанд. Дар Тоҷикистон саратони гарданаи бачадон пас аз саратони сина дуюмин бемории саратонии миёни занон маҳсуб мешавад.

Табибон таъкид мекунанд, ки ваксина ҳангоми гирифтани он пеш аз оғози ҳаёти ҷинсӣ самаранокии баланд дорад, зеро масуниятро барои муқовимат бар зидди вирус пешакӣ омода месозад.

Dialog.TJ