Ҳукумати Ҷумҳурии Ислоии Эрон баъди Ҷанги 12-рӯза бо Исроил дар як иқдоми бесобиқа тақрибан ним миллион муҳоҷири афғонистониро аз минтақаҳои мухталифи ин кишвар депорт кардааст. Мақомоти эронӣ гуфтаанд, ки дар миёни муҳоҷирони афғонистонӣ касоне пайдо шуданд, ки барои Исроил ҷосусӣ мекарданд.

Дар ҳамин ҳол, Созмони Милали Муттаҳид ҳам зикр кардааст, ки дар як рӯз беш аз 50 нафар афғон боздошт ва ба кишварашон депорт мешаванд.

“Би-би-сӣ” бо чанд нафар аз афғонистониҳои депортшуда суҳбат анҷом дода ва онҳо аз рафтори бади мақомоти амниятии Эрон шикоят кардаанд. Алӣ Аҳмад (ном иваз шудааст), ки дуюним сол дар Эрон мезист, мегӯяд дар замони боздошт ва депорт латукӯб шуда. Ӯ гуфт, “бо шлангу чӯб мезаданд” ва ӯро ба ҷосусӣ ба манфиати Исроил муттаҳам мекарданд. Ба гуфтаи ӯ, пул ва телефонаш гирифта шуда ва худи ӯ “бидуни як риёл” ба марз интиқол дода шуд.

Ҳодисаи мушобеҳро Абдуллоҳ Ризомӣ низ нақл мекунад. Ӯ мегӯяд, бо вуҷуди доштани виза, аз тарафи 15 нафар кормандони полис латукӯб шуд, шиносномааш мусодира гардид ва ӯро ба ҷосусӣ муттаҳам намуданд.

Дар ҳамин ҳол, мақомоти Эрон мегӯянд, ки ҳадаф аз боз гардонидани муҳоҷирон иҷрои қонун ва риояи ҳуқуқи башар аст. Вале таҳлилгарон, аз ҷумла Барнет Рубин, коршиноси умури Афғонистон ва мушовири собиқи Вазорати корҳои дохилии Амрико мегӯяд, ки Теҳрон дар пайи нокомиҳои амниятӣ дар баробари Исроил “гурбаи сиёҳ”-ро меҷӯяд ва афғонҳоро ба ҳайси сипари айб истифода мекунад.

Аз оғози ҷанги Эрон бо Исроил дар моҳи июн иттиҳомҳои оммавӣ бар зидди муҳоҷирони афғон дар шабакаҳои иҷтимоӣ ва расонаҳои вобаста ба ҳукумат афзоиш ёфт. Ҳатто наворҳои кӯҳна ба ҳайси далели даст доштани афғонистониҳо дар сохтани дрон ва ҳамкорӣ бо хадамоти ҷосусии Исроил дубора нашр шуданд.

Dialog.tj