Президенти Иёлоти Муттаҳидаи Амрико Доналд Трамп дар изҳороти нави худ гуфт, ки рӯзи ҷумъа, 8-уми август Президенти Озарбойҷон Илҳом Алиев ва Президенти Арманистон Никол Пашинян дар Кохи Сафед созишномаи сулҳро имзо хоҳанд кард.

“Ман бо хушнудӣ интизори дидор бо Президенти Озарбойҷон Илҳом Алиев ва Сарвазири Арманистон Никол Пашинян ҳастам, ки фардо онҳоро дар Кохи сафед дар як нишасти таърихии сулҳ мепазирам”- навишт Доналд Трамп.

Тибқи гуфтаи ӯ, ду кишвар солҳо дар ҳолати ҷанг қарор доштанд, ки ба марги ҳазорон нафар сабаб шуд: “Бисёре аз роҳбарон талош карданд, ки ин низоъро хотима диҳанд, аммо муваффақ нашуданд. Ҳоло бо шарофати Президенти Иёлоти Муттаҳидаи Амрико ин импонпазир гадид” – зикр кард Доналд Трамп.

Доналд Трамп гуфт, маъмурияти ӯ муддати тӯлонӣ бо ҳарду ҷониб музокирот анҷом медод. “Фардо Президент Алиев ва Сарвазир Пашинян дар Кохи сафед дар маросими расмии имзои созишномаи сулҳ ба ман ҳамроҳ мешаванд”- гуфт Трамп.

Ба гуфтаи президенти Иёлоти Муттаҳидаи Амрико Вашингтон ҳамзамон бо ҳарду кишвар созишномаҳои дуҷонибаи рушд ва ҳамкории иқтисодиро имзо мекунад, то иқтидори Қафқози Ҷанубӣ пурра ба истифода дода шавад.

“Ман аз ин роҳбарони далер хеле ифтихор дорам, ки барои мардумони бузурги Арманистон ва Озарбойҷон интихоби дуруст анҷом медиҳанд. Ин рӯзи таърихӣ барои Арманистон, Озарбойҷон, Иёлоти Муттаҳида ва ҳамаи ҷаҳон хоҳад буд” – зикр кард ӯ.

Ёдовар мешавем, ки моҳи март Вазорати корҳои хориҷии Озарбойҷон аз анҷом додани  музокирот дар бораи матни лоиҳаи созишномаи сулҳ ва барқарории муносибатҳои байнидавлатӣ бо Арманистон хабар дода буд. Дар моҳи июл бошад, пас аз тақрибан чил соли низоъ аввалин мулоқоти расмии дуҷонибаи Алиев ва Пашинян доир шуд, ки дар он ҷонибҳо матни лоиҳаи созишномаро мувофиқа карданд.

Dialog.tj