Раҷабалӣ Раҳмоналӣ, раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон зимни нишасти матбуотӣ хабар дод, ки дар нимсолаи якуми соли равон дар кӯлу дарёҳои кишвар 89 ҳодисаи ғарқшавӣ сабт шуда, дар натиҷа 91 нафар ҷон бохтаанд.

Ба гуфтаи манбаъ, 22 нафари ғарқшудаҳо зан (24%) ва 69 каси дигар (76%) мард будаанд.

Гуфта мешавад, ки аз шумораи умумии ғарқшудагон 11 нафарашон қасди ҷони хеш кардаанд.

Масъулин сабаби сар задани ҳодисаҳои ғарқшавии шаҳрвандонро риоя накардани қоидаҳои оббозӣ, беэҳтиётӣ, беназоратии волидон, садамаи нақлиётӣ, худкушӣ, мастӣ ва ғайра баён доштанд.

Иттилоъ дода мешавад, ки дар кишвар аз ҳама бештар дар вилояти Хатлон ҳодисаи ғарқшавӣ ба қайд гирифта шудааст, ки 41 нафарро ташкил медиҳад. Ҳамин тавр дар ҷойи дуюм вилояти Суғд меистад, ки 17 нафар ғарқ шудаанд. Ҳолати ғарқшавӣ дар ВМКБ 14 нафар, дар ноҳияҳои тобеи ҷумҳурӣ 12 нафар ва дар шаҳри Душанбе 7 нафар ба қайд гирифта шудааст.

Dialog.tj