Бар асоси натиҷаҳои нимсолаи аввали соли 2025 сатҳи таваррум дар Ҷумҳурии Тоҷикистон 1,8 фоизро ташкил дод, ки нисбат ба ҳамин давраи соли гузашта 0,1 фоиз камтар аст. Дар ин бора раиси Бонки миллии Тоҷикистон Фирдавс Толибзода дар ҷараёни нишасти матбуотӣ иттилоъ дод.

Ба гуфтаи ӯ, омилҳои асосии болоравии сатҳи таваррум афзоиши нархи маҳсулоти ғизоӣ (2,9%) ва хизматрасониҳои пулакӣ (3,4%) аст. Фирдавс Толибзода зикр кард, ки таварруми солона дар моҳи июни соли ҷорӣ 3,6% -ро ташкил дод, ки дар доираи ҳадафи муқарраршуда аз ҷониби Бонки миллӣ мебошад. Ин нишондиҳанда нисбат ба ҳамин моҳ дар соли 2024 0,1 банди фоизӣ зиёдт аст.

Раиси Бонки миллии Тоҷикистон афзуд, ки дар нимсолаи аввали соли 2025 мақомоти бонкӣ сиёсати молиявию қарзиро бар асоси қонунгузории соҳа, ҳадафҳои зикршуда дар Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олӣ ва санади “Самтҳои асосии сиёсати пулию қарзӣ барои соли 2025 ва давраи миёнамуҳлат” амалӣ кард.

Ба гуфтаи Толибзода татбиқи ин сиёсат имкон дод, ки рушди устувори низоми молиявию иқтисодии кишвар таъмин гардад, суботи макроиқтисодӣ нигоҳ дошта шавад ва шароити мусоид барои ҳимояти фаъолиятҳои соҳибкорӣ фароҳам оварда шавад.

 Dialog.tj