Раёсати Вазорати корҳои дохилӣ дар шаҳри Душанбе боз аз дастгир кардани фаъоли шабакаҳои иҷтимоӣ хабар дод.

Дар хабарномаи Раёсати ВКД дар ш. Душанбе омадааст, ки Давлатова Фирӯзамоҳ, сокини 41-солаи ш. Душанбе, муддатест дар шабакаҳои иҷтимоӣ саҳифаи худро таъсис дода, ба фаъолияти "бологер"-ӣ машғул аст. Номбурда мунтазам зимни пахши мустақим амалҳои ба иффату покдомании зан-модар иснод оварда, ҳамзамон бо вайрон намудани қоидаҳои забони адабӣ ва алфози қабеҳ навор нашр мекард.

Манбаъ менависад, ки бо вуҷуди чанд маротиба огоҳ намудан, Давлатова Фирӯзамоҳ амалҳои нодурусти худро дар шабакаҳои иҷтимоӣ такрор кардааст.

Гуфта мешавад, ки вобаста ба ҳолати мазкур нисбати Давлатова Ф. аз ҷониби кормандони Шуъбаи кофтукови ҷиноятии Раёсати ВКД дар ш. Душанбе протоколи маъмурӣ тартиб дода шуда, ба Суд ирсол гардид. Бо қарори Суд нисбаташ ҷазо дар намуди ҳабси маъмурӣ ба муҳлати 7 шабонарӯз таъин карда шуд.

Ёдовар мешавем, ки баробари дастгиру ҳабс шудани Давлатова Фирӯзамоҳ, ки дар шабакаҳои иҷтимоӣ бо тахаллуси “Фирӯзаи бренд” маъруф аст, фаъолони фазои маҷозӣ иловатан ӯро интиқод карда, ҷазои пешбинишударо кам ва осон арзёбӣ карданд, зеро ба андешаи шарҳнависон ӯ дар наворҳояш шаъну шарафи зан-модари тоҷикро паст зада, рафтору гуфтори носолим доштааст.

Dialog.tj